抹茶杯麵 X 乳酪零食 到底伏唔伏!?

去旅行賣零食番嚟做手信有時都幾傻!辛辛苦苦搬番嚟,可能  7仔已經有得賣囉!最近我依莉詩就發現到兩款大熱手信!第一款就係日本最新出嘅合味道抹茶杯麵,第二款就係韓國好 hit 嘅乳酪零食。

▲ 合味道抹茶杯麵 $19.9

抹茶放係甜品就好夾,但放係杯麵聽落就有啲怪。不過就好吸引我呢啲抹茶去試。杯麵包裝同平時合味道杯麵差唔多,size 都係一樣,不過上面嘅繪畫就好有日本風,仲有富士山添!

▲ 打開杯麵,材料同海鮮杯麵差唔多,不過就多咗啲綠色粉,聞落有啲甜甜地。

▲ 加水後啲湯變咗綠色,其實都幾恐佈。

▲ 麵都係綠色,不過就無乜抹茶味,只係多咗少少甜同奶味,有少少失望。

韓國至 hit 乳酪系列手信

益力多味嘅零食呢排好 hit 做手信,估唔到咁快就可以係香港買晒咁多款!

▲ MURGERBON 乳酪味杏仁 $10

杏仁上面有層粉,好似澱粉咁有啲甜係利上散發,十分特別。

▲ 樂天乳酪軟糖 $15

軟糖都係益力多樣,叫得乳酸,當然係酸㗎啦!

▲ COSMOS 乳酪味薯片 $25

至於薯片就無乜乳酪味,只係多咗少少甜味,不過個包裝咁大又成支益力多樣,好搶鏡!



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。