唔洗排長龍!香港都食到台南街頭小食 – 限時 3日試食「糯夫」米糕 x 等天光三明治

每隔幾個月就會有台灣小食空降鑽石山荷里活廣場,記得上一次嘅鴨蛋湯真係好味到震!今個復活節一連 3日又有另外多間台南早餐店到港,我 依莉詩 就有幸係活動之前搶先試食。

 

捐  $20 有得食,一舉兩得

同上幾次一樣,只要即場捐款 $20 予港澳台灣慈善基金會有限公司用作支持台南災後重建工作,就可以換領一份美食。即係場內款款小食 $20 就有交易,一啲都唔貴。

 

▲所長茶葉蛋豆乾堡

呢個豆乾堡塊豆乾又厚又入味,仲好煙韌,而入面隻《所長茶葉蛋》更加係當中嘅靈魂,嚴選 7-10個月大、最具營養嘅優質 M級雞蛋,先同雞蛋做 SPA按摩,再用茴香、花椒、桂枝等10多種中藥材滷製 96小時而成,彈牙入味,配合特製的酸菜一齊食,爽口有層次。

 

▲ 茶葉蛋只揀成年嘅雞所生嘅蛋,好似話係最有營養的啊!

▲ 酥炸思慕魚柳

《等天光三明治》聽個名以為係有三文治,但原來老闆今次帶嚟嘅係酥炸思慕魚柳。採用台南最具代表性食材-虱目魚,粘上麵包糠,以 180度炸 1分鐘,炸出香脆嘅魚柳。最重要係點老闆秘制嘅塔塔醬,酸酸甜甜中油膩感,食完一條又一條都唔嫌。

 

▲ 香煎虱目魚菲力

《長盈海味屋》同樣帶來虱目魚,不過就選揀以香煎方法呈現。魚菲力食落有豐富魚油,香脆魚肉有彈性,不過因為係背鰭肉,所以都幾多骨,所以要小心食,唔好邊食邊講嘢啊!

 

 

 

▲ 糯夫米糕

今次最最最必食嘅就係《糯夫米糕》,除咗因為佢行蹤飄忽,米糕更係傳承著阿嬤手藝的古早風味。糯米每一口都散發麻油味同米酒香,軟糯彈牙,配合入口即化嘅豬軟骨,有陣陣飽滿嘅幸福感。

 

 

▲ 因為係流浪攤,行蹤飄忽,就算當地人要嚐一口都絕非易事,要每日緊貼 Facebook 專頁先知道當日營業時間同地點,所以要好好把握機會去荷里活廣場試下。重點係,糯夫超靚仔!

 

▲ 今次嘅小食款款都好有水準,難怪係台灣間間都係人龍店。就算無時間飛,都可以要抽少少時間嚟掃街吧!

 

台南街頭小食節 – 排隊小店的早宵風味篇

日期: 2017年 4月 15日 至 17日

時間: 中午12 時至晚上7時

地點: 鑽石山荷里活廣場一樓明星廣場

 

更多小食推介!

學生、上班族外賣新選擇!熱辣辣飯卷 + 爆漿冰火芝士蟹丸 邊行邊食

 

【依莉詩試食】BAKE 登陸觀塘!限量發售 1000個朱古力芝士撻

 

睇更多拍拖好去處!

IG: ErieDiary
網址:ErieDiary.hk
YouTube:Diary Erie


About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。