尖東人又多，食肆又多，但就轉過不停，最近又有新食店登陸。鋪頭以搶眼紅色為主調，加上怪獸鰻魚熱飯卷、熱溶芝士炸雞，睇落好似韓國小食店，但原來係 3個 90後自創嘅美食。我依莉詩上星期就同兩位朋友經過，入去一試啦！
熱飯卷方便學生、上班族
記得幾年前係附近讀書，每逢 midterm 都要去新文華一帶買早餐、lunch 番去邊開會邊食，當時我最 like 就係熱辣辣嘅香菇雞包，又平又大又多餡。不過人總係貪忘舊嘅，最近尖東開多咗唔少食店，而今次我就比呢間 Monster Union 嘅熱溶芝士炸雞吸引咗入去。濃濃嘅芝士蓋滿炸雞，雖然有啲熱，不過唔理啦，幾熱都要食！
其實呢間店以熱飯卷做主打，老闆話係想將不同國家美食融入熱飯圈中變成香港地道美食，目標咁偉大，所以飯卷有齊日本壽司、韓國飯卷嘅特色，仲要係台灣人鍾意食嘅熱飯，可以話係集國家之大成。
▲ 為咗方便一路行一路食，老闆設計咗幾個唔同顏色嘅盒。每一個上面嘅圖案都有唔同意思，有啲仲好貼地㗎！
▲ 怪獸鰻魚熱飯卷 $52
熱飯卷有豬、牛、雞同鰻魚鰻魚，有面有蛋有菜有肉都好足料同大條，包食得飽。不過叫得熱飯就一定要襯熱食，唔係啲紫菜淋咗口感就會好奇怪㗎啦！
▲ 爆漿冰火芝士蟹丸
呢個爆漿冰火芝士蟹丸值得一試，少少攻鼻嘅凍 Wasabii 蛋黃醬淋係暖心嘅芝士蟹丸，表面冰凍，一咬落去爆啲熱芝士出嚟，非常刺激！
▲ 熱溶芝士炸雞 $38
起初以為佢係韓式炸雞，不過食落又好似有少少分別，每粒都唔算大，贏在無骨夠脆，芝士味都幾濃，幾香口。
▲ 三角層層脆腸 $20
三角形嘅腸見過未？原來係將一條腸切開三分當三條。開頭以為佢整得個樣特別啲呃秤，但原來佢並唔係普通司華力腸，食落有少少台灣腸嘅口感，加上砌嚟煎，比原條更脆口。
Monster Union
地址: 尖沙咀東科學館道14號新文華中心61號舖
【延伸閱讀】
