~尖沙咀的夢幻世界~與閨密必去的少女風樓上 Cafe

就算同男朋友感情幾好都好,有啲地方始終要同閨蜜一齊去先有 feel。就好似嘆 Afternoon Tea 咁,男士們唔係覺得貴就係覺得啲嘢唔飽肚。最近我依莉詩就拋低男友去咗尖沙咀鬧市中嘅 L’ Tea Room,同好姊妹吹水、影相,悠悠閒閒過一日。

就是要給少女自拍的粉色花園

走入尖沙咀舊樓,慢慢都估唔到會係另一個世界,一推開門我同 yoyo 就被滿滿嘅花花佈置迷住,真係𣊬間變花痴!Cafe 以白色為主調,白色餐桌配上碎花,加上水晶燈同醉花窗簾,就可似去咗英式花園一樣,整個人都變得優雅。雖然店面不大,但座位間都非常寬敞,傾心事或是八卜都唔怕被其他人聽到,可以好好暢談。而最正就係店內有二個影相位,不但有花束、蕾絲、水晶燈等佈置,仲有唔少道具可以拎上手,客人同客人都會輪住慢慢影,唔爭位,感覺好好呢!

▲ 最大嘅影相位用梳妝枱做主,上面放滿舊式電話、巴黎鐵塔、珍珠鏈、花花茶杯同花球,完全係少女夢寐以求嘅房間佈置。

▲ 另一個影相位係精緻嘅壁爐,配上花環、花花茶杯同三層架,好有家嘅感覺。

▲ 碎花白色餐桌加埋碎花窗簾同水晶燈,令 cafe 好舒服,有種悠閒、無拘無束嘅感覺。

Tea Set 嘆足兩個半鐘

因為 Cafe 係訂枱制,每日分 12nn-2:30pm 或 3pm-5:30pm 兩個時段,所以絕對可以坐足兩個半鐘,唔會趕你走,而且花茶仲可以根據自己濃度喜好,請店員額外加茶包或加水,無限添飲。至於食物就係女生最愛嘅 Tea set ,當中有甜點同鹹點,可以揀用 Tea set 盤上或者 三層架上,顧及大家打卡需要呢!如果要講食物質素就一般啦,始終大家去嘅目的都純粹想有個舒服嘅地方同姊妹們吹水吧!

 

▲ 上次食嘅係聖誕版 Tea set,所以加咗啲聖誕裝飾,不過同平時嘅分別不大。鹹點有挪威煙三文魚碎蛋牛角酥、田園沙律、鮮蝦多士、意式香草巴拿馬火腿配哈蜜瓜、黑椒三文魚醬蛋脆餅。甜點就有粉紅紙杯蛋糕、原味英式鬆餅 (配果醬及忌廉)、紅唇特濃朱古力慕絲、法式焦糖燉蛋同曲奇。兩個女仔食都夠僅僅飽。

 

 

L’ Tea Room
地址:尖沙咀宜昌街6號2樓
價錢:HK$220 /位 (兩位起)
時段:12nn-2:30pm或3pm-5:30pm
訂座電話:2345 0690



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。