最近好忙好少出去食好嘢，今次由教父帶我 依莉詩去大圍冬菇亭食日本料理！你無聽錯，冬菇亭唔止大排檔，原來仲有日本嘢食，而且刺身同串燒水準都幾高，坐得又舒服，完全打破我對冬菇亭嘅印象！
打破冬菇亭舊印象！環境光猛有冷氣
細個去冬菇亭都覺得好污髒，又熱又焗，個個係度食煙飲酒，估唔到而家嘅冬菇亭已經唔同晒！呢間「壹級日本料理」喺大圍美林邨冬菇亭，外觀保留冬菇亭原有設計，所以樓底極高，裝修過後，內部亦變得光猛有冷氣，坐得都幾舒服。店內唔單止有卡位，仲有bar 枱同大圓枱，無論一個人、情侶定成班人都照顧到。
▲ 冬菇亭嘅樓底比較高，環境好開揚。我哋放工去食，食客唔多，可以靜靜哋傾計。
款式多食物水準高
講到食物款式，壹級日本料理 都幾多元化，由一般日本餐廳有啲壽司刺身、串燒炸物、拉麵魚生飯，到近期大熱嘅浜燒海鮮都有，最特別連鐵板餐都有，真係近合街坊需要，一家大細都有啱食嘅嘢。今次呢餐連加一食咗$1,258，以屋邨餐廳未算特別平，但就算與一般日本餐廳比較，呢個價錢食到呢個水準嘅刺身同串燒，其實都算抵！始終今次揀嘅刺身都係比較貴嘅部位，亦都有返咁上下新鮮。
▲ 刺身併盤
呢盤刺身併盤都幾誇張，有帶子(4片) 、赤身(4片) 、珍寶赤蝦(2隻) 、劍魚腩(4片) 、薄切八爪魚(6片) 、極上三文魚腩(6片) 、油甘魚腩(4片) 、海膽(半板) ，都係比較頂級嘅部位，估唔到屋邨餐廳都可以食到。刺身大部份都係厚切，而且都新鮮爽甜，所以就算價格睇落唔平，但性價比都算高，出面好難用呢個價，食到呢個級數嘅刺身。
▲ 極上三文魚腩(6片) $98
極上三文魚腩厚切肥美，質感爽口彈牙，而劍魚腩同油甘魚腩放入口充滿油香，厚切令入口半溶，而有口感，平衡到當中嘅優點。
▲ 珍寶赤蝦(2隻) $68
赤蝦好大隻，啖啖肉，而且新鮮爽甜。
▲ 海膽(半板) $144
海膽結終係我摯愛，呢半板加拿大海膽厚肉肥美，一塊就有我兩隻手指大小，非常飽滿，食落好有海水味，仲好 Creamy，入口即溶嘅感覺，真係好幸福。加埋紫菜一齊食又有另一番口感。
▲ 串燒併盤
除了刺身，呢度嘅串燒都係唔錯嘅選擇。$12-40就有一串，今次就試咗雞軟骨串、牛脷串、霜降和牛粒串、黑豚腩串、蘋果豚肉串、迷你甜薯同燒菠蘿。每串都充滿炭燒香氣，調味當中唔會過鹹。尤其霜降和牛粒串，肉質鮮嫩，厚切都唔怕太老。而最有驚喜就係蘋果豚肉串，豬肉捲住蘋果，食落爽口清新，可以減低食燒物嘅油膩感。
▲ 燒菠蘿 $28
燒菠蘿亦係值得一讚！燒得啱啱好，咬開焦糖外層，菠蘿肉嘅肉汁擠晒出嚟，酸甜並重，夏天食好開胃！
▲ 燒粟米 $22
又係燒粟米咁橋？不過佢唔係「粟一燒」！哈哈～呢碟燒粟米又係喺肉食獸嘅金露，粟米同樣燒得啱啱好，唔會太乾，粒粒粟米都仲有汁。
▲ 壹級鐵板餐(燒汁或咖喱汁)
除了比較貴嘅刺身同串燒，其實呢度都有啲鐵板餐同魚生飯，呢啲價格都比較親民，$50-100內都有交易，所以都係豐儉由人。
▲ 鐵板西冷(燒汁)跟白飯及味噌湯 $88
如果以醫肚為目標，呢度都有得据扒，厚扒西冷肉嫩腍軟，都唔係太貴，$88有交易。
▲ 鐵板三文魚扒(燒汁)跟白飯及味噌湯 $88
三文魚扒經過封煎，外脆內嫩，配上蒜蓉汁亦有另一番風味。
壹級日本料理
地址：大圍美田路30號美林邨熟食亭1-4號舖
開放時間12nn-2:45pm（午市）／5:30pm-11pm（晚市）
電話2813-9368
各區美食精選！
地膽帶路！土瓜灣街頭小食 – 足料花膠魚肚粥 + 濃香米香腸粉
地膽推介！$150 掃盡 5大紅磡街頭小食 – 混醬班戟麵條 + 超大粒手製芋圓
死場不再！10間平民食肆進駐荃灣新 Food Court – 嫩滑手撕雞腸粉 x 醒胃麻辣串
粉色系呃 like 甜品團！食盡荃灣 3大潮食店 – 玫瑰士多啤梨窩夫 X 山形縣白桃厚班戟
大坑 2大呃 Like 甜品！ 粉色棉花糖燒 x 彩虹沖繩鹽刨冰
5萬呎水產市場登陸黃埔！九號水產 4大食店率先睇 – 蟹痴必掃北海道皇帝蟹
旺角 1日 4餐，由朝食到晚！青檸烏冬係劣食？韓系日式吉列牛一定正？
銅鑼灣 SOGO 地庫重開！5大人氣日本過江龍進駐 必食香脆海鮮煎餅 + 鹿兒島彈牙魚餅
元朗 4大人氣食店！必食北海道布丁燒 X 啖啖肉無骨雞翼包
屯門潮食集中地！紅橋 4大不得不吃的小食+主菜+甜品
睇更多拍拖好去處！
FB： 依莉“詩”生活
IG： ErieDiary
網址：ErieDiary.hk
YouTube：Diary Erie