元朗 畀大家嘅印象可能只係大馬路兩旁嘅人來人往，但其實 元朗 好大㗎！今次我 依莉詩 就帶大家去 元朗 後花園 – 爾巒旁邊嘅天空之城搵食！呢間 Boss Kitchen 唔單止環境悠閒，仲有毛小孩冷氣區同泊車位，最啱揸車嘅人同狗主舒舒服服歎西餐！
元朗後花園 狗主聚會 x 情侶浪漫晚餐
爾巒旁邊嘅天空之城聽落未必知係邊，但地點都算幾方便，就算無車嘅朋友，只要係西鐵站搭71/72/601/602/608 小巴，7分鐘就到。揸車去就更方便，出面就有多個泊位，唔使擔心泊車問題。而餐廳分咗 3區，有悠閒嘅露天花園區，浪漫嘅室內區同毛小孩冷氣區。無論閨蜜閒聚定情侶晚餐都一樣啱feel，狗主仲可以帶狗狗一齊歎冷氣𠻹！
▲ 天空之城有多間餐廳，一間一棟，自成一閣。出面仲有多個泊車位，方便駕車人士嚟搵食！
▲ 天氣咁熱，毛小孩冷氣室就可以畀佢哋一齊歎冷氣。狗主聚會就可以更安心！
▲ 室內有水晶燈裝飾，夜晚會變成好有情調嘅餐廳，啱晒情侶節日慶祝！
巨型牛扒 x 脆卜卜蘋果批 高質西餐價格合理
以西餐嚟講，Boss Kitchen 價格都好合理，食物質素都唔錯！大過塊面嘅巨型帶骨肉眼唔使 $400，價錢同 Outback 錯唔多。而我 依莉詩 同 YOYO 就最愛酥皮蘋果批，酥皮同蘋果片輕薄鬆脆，配埋雪糕就更清新，令整餐非常完滿！
▲ 燒美國帶骨肉眼配煙肉菠菜烤新薯 $388
呢塊 16安士帶骨肉眼超巨型！真係大過塊面！7成熟左右，肉質嫩滑、完全唔乾身，仲帶點肉汁，好Jiucy 同入味，唔使點芥末都已經好正！
▲ 芝士忌廉蟹肉釀比特菇 $78
比特菇一樣好大個，芝士忌廉唔膩，而且蟹肉釀得好滿好豐富，啖啖都好滿足！
▲ 西班牙辣肉腸白汁煮大蜆 $98
大蜆最緊要無沙！而且每隻都好彈牙，有鮮味！連埋辣肉腸一齊食又有另一種味道。
▲ 香煎大蝦龍蝦汁海鮮意大利飯 $188
大蝦又係勁大蝦，而且大隻得嚟無雪味，反而好彈牙入味。個飯亦都好有鮮味，濃度適中，唔會太膩。
▲ 酥皮蘋果批配雪糕 $78
我 依莉詩 同 YOYO 就最愛酥皮蘋果批，酥皮同蘋果片輕薄鬆脆，配埋雪糕就更清新，令整餐非常完滿！
老總廚房 Boss Kitchen
地址：元朗錦田高埔村108號天空之城第6座地下
各區美食精選！
旺角慢煮快食新體驗！6間中日泰美食登陸彌敦道 700號｜北海道拉麵X清邁咖喱麵
地膽帶路！土瓜灣街頭小食 – 足料花膠魚肚粥 + 濃香米香腸粉
地膽推介！$150 掃盡 5大紅磡街頭小食 – 混醬班戟麵條 + 超大粒手製芋圓
死場不再！10間平民食肆進駐荃灣新 Food Court – 嫩滑手撕雞腸粉 x 醒胃麻辣串
粉色系呃 like 甜品團！食盡荃灣 3大潮食店 – 玫瑰士多啤梨窩夫 X 山形縣白桃厚班戟
大坑 2大呃 Like 甜品！ 粉色棉花糖燒 x 彩虹沖繩鹽刨冰
5萬呎水產市場登陸黃埔！九號水產 4大食店率先睇 – 蟹痴必掃北海道皇帝蟹
旺角 1日 4餐，由朝食到晚！青檸烏冬係劣食？韓系日式吉列牛一定正？
銅鑼灣 SOGO 地庫重開！5大人氣日本過江龍進駐 必食香脆海鮮煎餅 + 鹿兒島彈牙魚餅
元朗 4大人氣食店！必食北海道布丁燒 X 啖啖肉無骨雞翼包
屯門潮食集中地！紅橋 4大不得不吃的小食+主菜+甜品
睇更多拍拖好去處！
FB： 依莉“詩”生活
IG： ErieDiary
網址：ErieDiary.hk
YouTube：Diary Erie