one~two~three~four~扭呀扭~扭呀扭~將軍澳 TKO Gateway 裝修後重新開幕，翠兒、賓尼兔坐幸福列車嚟開 party。快啲同門口嘅巨型賓尼兔打卡吧！
幸福列車配搭奇怪
雖然唔知點解個佈置 2月5嘅就拆，但就用幸福列車就主題，而且仲要用桃紅色做主調，加入翠兒、賓尼兔等卡通人物，成個配搭都好奇怪。不過只要有卡通人物嘅影相位，我依莉詩就係唔會放過！
▲ 巨型火車桃紅色火車係月台上相當搶眼，一個個紙牌卡通人物企定定等你過去同佢影硬照。
▲ 乘搭列車前，不妨坐係月台同有趣嘅 Porky Pig 暢談旅遊趣事，不過而影得晒個月台就要好有技巧了！
▲ 我呢啲淑女當然要學下 Lola Bunny 坐得咁迷人啦！
▲ 唔好唔記得最巨型嘅相位，就係門口呢隻巨型賓尼兔啊！睇下佢嘅車長造型幾有型！
消費換蘿蔔蛋糕夠特別
雖然影相位有啲過意唔去，不過列車入面嘅蛋糕換領店都算幾吸引。只要消費 $600，憑商場內不同商戶發出之七日內機印發票最多兩張，最少一張電子消費，就可以換到列車蛋糕一盒。一盒有齊朱古力味嘅 Lola Bunny、芒果味嘅 Tweety 同 蘿蔔味嘅 Bunny，加埋個幸福列車盒，好有心思，自己食或者送禮一樣得體。
▲ 蘿蔔味蛋糕夠晒特別，一絲絲嘅紅蘿蔔放入杏仁蛋糕，既香口又有咬口，唔錯呢！
▲ 如果唔想食蛋糕，都可以換領行李牌一個，條件一樣，不過我就覺得蛋糕抵啲啦！
儲印仔完成幸福之旅
去台灣大家都好鍾意呢本簿四圍蓋印仔，證明自己去過嗰個地方，而今次 TKO Gateway 就係商場 5個唔同地方放咗旅遊景點鋼印，係東翼1樓顧客服務台就可以免費拎一本簿蓋印。雖然儲齊都唔會有禮物，不過有得玩下嘛！
▲ 鋼印質素唔差架，值得留念架！
Looney Tunes 期間限定商店
只係同 Looney Tunes 卡通人物影相，粉絲一定唔夠喉，好彩車尾仲有間限定店販售多款精品，包括精選文件夾、主角造型 T-Shirt、風褸等，要買就快啦！
日期：2017年1月14、15、21、22、26及27日
時間：中午12時至下午7時
▲ 雖然精品店唔係好大，不過都幾多種類，記得要行埋去車尾睇呀！
新年氣氛 ★★☆☆☆
必影指數 ★★☆☆☆
必買指數 ★★★☆☆
日期：2017年 1月 10日 至 2月 5日
地點：TKO Gateway
【延伸閱讀】
