【依莉詩試食】BAKE 登陸觀塘!限量發售 1000個朱古力芝士撻

上年 BAKE 芝士撻專門店一進軍香港,掀起咗一個無撻不歡嘅熱潮。SOGO 地庫打足幾個蛇餅,打足兩個鐘先買到,可謂一撻難求。正當芝士撻開到成行成市,連炸雞叔叔都有得賣嘅時候。BAKE 竟然係 APM 開分店,仲推出 1000個限量朱古力芝士撻添!我依莉詩就晨咁早由屯門搭到觀塘尋食啦!


限量 1000個 一撻難求

觀塘店十點半先開幕,但一早已經有十幾個撻迷排隊等食。為嘅就係今日首推,1000個嘅朱古力芝士。眼見個個都一盒盒咁買,據聞 3個鐘就掃清光!不過今日食唔到都唔緊要 123日至 27日,SOGO店每日都有限定1,000個,真係手快有手慢無。

二重燒製法 流心軟滑

同出面嘅朱古力芝士撻唔同,BAKE 用咗北海道函館產輕味芝士、別海產濃味芝士及法國產鹽味忌廉芝士,再將朱古力加熱後混入芝士餡料,透過「二重燒製法」,焗出外脆內軟嘅流心效果。

▲  朱古力同芝士兩種味好蝦人,唔係間間都做得好,而呢件朱古力味比較重,比起原味甜少少。雖然放耐咗唔點流心,不過食落好軟滑,好飽肚架!

▲ 原味相信唔使我講都知咩味啦!對於唔鍾意食酸嘢嘅我,都係比較甜嘅朱古力味更啱我口味!

▲ 每盒 6個芝士撻 $130,即係差唔多 $22一個,貴唔貴就見仁見智,不過都肯定好食過唔少跟風推出嘅芝士撻。依家市面上太多一舊舊、唔軟滑,明明好多顏色都一樣味嘅芝士撻了!

BAKE 地址:

 觀塘創紀之城五期APM二樓L2-3

銅鑼灣軒尼詩道555號崇光百貨地庫2B2-16



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。