新年咁多日假，梗係去親戚到拜年兼開枱啦！如果食到「十三么」仲唔呵呵笑～今次朗豪坊就以麻雀做主題，將大堂變成巨型麻雀枱，唔單止可以做偽文青影靚相，仲有機會玩遊戲贏副「十三么」擦膠添！貪玩嘅依莉詩當然急不及待玩埋一份啦！
4大影相位 齊扮偽文青
講到麻雀唔好以為代表爛賭，原來都可以好文青，始終都係中國人重要嘅文化嘛！係呢張巨型麻雀枱上面唔單止有放大版麻雀，連骰仔、起莊都一樣咁大，麻雀枱更以冰室做主題，將懷舊添加更多玩味，完全飛甩老土！
1) 影完必定發發發
一踏入呢張麻雀枱，最吸引嘅就係呢隻仲高過我嘅麻雀同骰仔，同咁大隻「發」財麻雀，今年仲唔發！發！發！
2) 新一年齊齊起莊
葉劉要起機，打麻雀梗係要起莊，見到咁大個莊係咪好有氣勢呢！新一年一於改口，齊齊起莊吧！旁邊嘅巨型「蘭」花麻雀一樣特別，走入去就可以變成麻雀一部份。
▲ 葉劉要起機？不如開枱起莊仲實際啦！
3) 懷舊麻雀冰室
麻雀同冰室一樣充滿懷舊味道，鋪滿麻雀嘅枱面加上掛住一個個雀籠，大家可以係度大玩復古Selfie 呢！
▲ 間冰室有齊收銀台、卡位，就連電話、吊扇同鐘都有，影落超有 feel 呢！
▲ 成張枱都係麻雀，係咪好想打番幾圈呢？
▲ 唔知大家有冇發現，唔止一索，呢度所有麻雀都有隻喜雀呢？原來呢隻就係傳說中嘅雀王！
4) 開枱心聲扮文青
各位偽文青應該去過《白做園》打卡，入面嘅句子相信都係唔少人心聲，而呢張麻雀枱上面嘅霓虹燈句子就應該係唔少「開枱」之人嘅心聲，想新年搵雀腳又唔想咁明顯，快快 Post 張 Selfie 出嚟吧！
玩遊戲贏超打耳十三么擦膠
除咗影相位，今次都係重點之一。不過就要消費滿 $500 先可以換領「喜雀遊樂園」遊戲卡一張，成功挑戰「海底撈月」及「比翼雙飛」遊戲，得到1至3個印章先可以得到「喜雀耍樂十三么貼紙」，而儲齊 6個印章先可以拎副「喜雀耍樂十三么擦膠」。既要眼明手快，仲要考彩數，難度都幾高架！
▲ 「海底撈月」要係 30秒佈係巨型荔枝皮麻雀箱內撈出 3隻指定麻雀，個網又重、麻雀又大隻，眼明手快都仲要有好臂力先得架！
▲ 「比翼雙飛」攤位就要係 3次機會入面，用籌碼擲中枱上嘅一索或者九索，重點係中間隻雀係無獎嘅，所以超考眼界同運氣呢！
▲ 要得到呢副像真度極高嘅限量版「喜雀耍樂十三么擦膠」(每日限量50份) 一啲都唔容易，我玩咗幾次，「海底撈月」都仲啱啱好夠時間撈得晒 3隻，但 「比翼雙飛」就真係講彩數啦～要 3個籌碼都中，我諗要上 10樓交番百幾兩百蚊玩掟彩虹，交下學費先啦！
▲ 不過就算玩完遊戲咩都攞唔到都唔使失望，1月27日前係商場滿 $500都會有「喜雀耍樂十三么利是封」一套，每套都有張「十三么喜雀貼紙」，都幾得意架！
新年氣氛 ★★★☆☆
必影指數 ★★☆☆☆
必玩指數 ★★★★☆
喜雀遊樂園
日期：2017年 1月13日至2月12日
地點：朗豪坊 4樓通天廣場
【延伸閱讀】
