即製巨型巴馬臣芝士撈麵!$330 勁食生蠔長腳蟹 x 香噴噴榴鏈班戟

平時慳慳埋埋都係想食餐好,我 依莉詩 同好姊妹 YoYo 就約好每個月點都要出去食番餐慰勞自己上幾次就去咗嘆下午茶掃街,今次就決定食自助餐!呢間 Hillview Café 雖然唔係喺五星級大酒店入面,網上見啲食評都一般,不過見今個月主題係海鮮大聯盟,有生蠔長腳蟹一於去試下!

款式不多但樣樣足料啱食

宜家好少自助餐會有生蠔同長腳蟹,難得三百幾蚊就有得食真係唔錯呢!雖然食物款式唔算好多,一張長枱加兩張細枱就放得晒,不過食物大部份都好足料,而且啱食。就好似帶子釀芒果、日式鰻魚飯、鵝肝蒜茸飽同海鮮芝士菇焗都係回本菜。不過刺身就麻麻哋,切得比較厚,反而熟食水準較高。

 

▲生蠔係新西蘭大生蠔,都有中 size,亦算新鮮,因為當日人流唔多,想食幾多都得!

▲ 長腳蟹係去自助餐必食之選,又甜又多肉,比起生日去迪迪尼食嗰啲更新鮮呢!

▲ 每人都會送一隻黑松露芝士焗帶子,好似飲緊濃濃忌廉湯咁,勁 Creamy!

▲ 日式鰻魚飯啲饅魚都幾多幾大舊,好足料。

▲最特別就係廚師會即場用原個巴馬臣芝士撈脆煙肉麵俾你食,聞落超香呢! (不過一份份量比較多,小心被填飽肚!)

▲ 食自助餐我最鍾意就係食蜜瓜,飽飽哋食件蜜瓜清清喉嚨又可以再食過。

甜品無伏,即製榴鏈班戟香噴噴

甜品方面都係唔多選擇,十隻手指數得晒,不過款款幾味道都唔錯,最起碼無伏。而雪糕係杯裝 Dreyer’s,唔怕啲好食嘅味比人食晒。而最正係八點後會有廚師即整榴槤班戟,真係有果蓉係入面,好濃郁呢!

▲ 焗粟子蛋白撻細細件都好好食㗎!

食足 3小時環境舒適唔爭食

食自助餐最怕多人爭食。起初我哋都有啲擔心,因為呢間餐廳之前有做開團購,網上食評一般,大部份都係話 refill 得少又慢,不過去到同想像中嘅熱鬧有啲差距,只係得三枱人,環境非常靜,無人爭食,仲可以坐足 3個鐘,勁好呢!不過咁講,多唔多人同爭唔爭食都好睇彩數嘅。

▲ 明明食物質素都唔差,性價比都算高,仲要係假期嘅夜晚,真係唔多明白,食自助餐食到好似包場咁真係第一次。

山景閣 Hillview Café

地址: 九龍尖沙咀天文台道13-17號仕德福山景酒店

星期一至四:成人 (HK$331.20)、小童/長者(HK$232.20)

星期五至日:成人(HK$358.20)、小童/長者(HK$250.20)

日期:2017年 5月1日至 31日 (不適用於母親節及其前夕)

時間:6:30pm-9:30pm

電話: +852 2313 7024

 

Hello Kitty 入侵 灣仔築地 大搞櫻花祭! 呃 like 必食 6款 Kitty x 櫻花美食

銅鑼灣 SOGO 地庫重開!5大人氣日本過江龍進駐 必食香脆海鮮煎餅 + 鹿兒島彈牙魚餅

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。