【聖誕好去處】愛麗絲入侵沙田星空花園!12大玩味打卡位

每年沙田新城市廣場都係聖誕燈飾嘅重頭戲!今年以愛麗絲主題少咗份浪漫,多咗點玩味!雖然唔似以前燈海處處,但每個影相位都打晒燈,就算用手機,唔識取景都已經可以影到靚相!就等我 依莉詩 同大家分享吓有咩靚靚打卡位啦!

沙田星光花園變身愛麗絲奇幻世界

今次新城市廣場一改以任參考日本六本木嘅燈海風格,改以《愛麗絲夢遊仙境:穿越魔鏡》(Alice Through the Looking Glass)為設計靈感,將 7樓星光花園打造成多個夢幻景點,玩味十足!已經今年加設「快速通行證(FASTPASS)」,商場VIP會員可以用 8積分換領快證入場,大大節省輪候時間!雖然今次聖誕裝置每個影相位都係一個個,不過反而就有更多影相位。依莉詩就估計算有起過 20個靚位可影,喺呢度我就介紹 12個自己最鍾意㗎啦!

 

打卡位1:Mirror Dome仙鏡圓頂屋

喺星光花園中央嘅 Mirror Dome 仙鏡圓頂屋係最著目嘅影相位,屋內嘅奇幻星球、蝴蝶、粉紅鶴同可愛貓貓草雕非常浪漫,好似又咗仙境一樣!

▲ 粉紅鶴絕對令少女心大爆發!

打卡位2:巨型發光貓眼蘑菇

走出 Mirror Dome 仙鏡圓頂,花園有超過100顆晶瑩剔透嘅發光蘑菇同不同形態嘅貓草雕,散發住童話氣息!

打卡位3:奇異舞動玫瑰花

除咗發光蘑菇,仲有過百朵 6呎高粉紅同粉紫色玫瑰花璀璨綻放,每朵玫瑰花奇異舞動,浪漫之餘多了一番趣味!

打卡位4:100呎長顛倒光影隧道

一如以往,星光花園中間都會有一條100呎長隧道,而今年隧道加上了粉紅粉藍兩色相間嘅光影外框,每個外框相互傾斜,錯落有序,形成一條錯綜視覺嘅奇妙隧道,好似無盡頭一樣!

打卡位5:巨型幻象咖啡杯

另一邊廂嘅10呎高巨型幻象咖啡杯,入面有翻側嘅咖啡杯、鑰匙、書、鐘、小茶杯等愛麗絲小物,同樣有錯覺效果,好似就快會被吸入「縮小」世界一樣!

打卡位6:繽紛萌貓聖誕樹

除咗以上嘅大型裝置,另外幾個裝置比較細型,但就一早打好晒燈,日頭夜晚影都一樣靚!就好似呢棵聖誕樹有4隻超萌貓咪,可愛又不失趣味!

打卡位7:巨型紳士帽子

瘋帽絕對係愛麗絲世界嘅標誌之一,喺大大頂粉紅色條子紳士帽子下,自己就好似縮細咗一樣,旁邊仲有好多隻凌厲眼神嘅貓眼望住自己𠻹!

打卡位8:神秘大嘴貓咪

走入呢個巨型貓口,就會進入時空錯置嘅顛倒世界。你又準備好入去呢個奇幻世界未呢?

打卡位9:巨型紳士貓

喺貓蹤處處嘅世界,仲有隻9呎高紳士貓庸懶地半挨半躺,非常可愛!

玩味特濃的愛麗絲睡房

離開星光花園,商場3樓同樣喺愛麗絲嘅世界,正在舉行攻陷韓國少女心嘅「Alice: Into the Rabbit Hole」〈이상한 나라의 앨리스〉裝置藝術展覽,香港站除咗有韓國SNS洗版嘅超級巨型愛麗絲充氣娃娃、以樹屋為藍本嘅愛麗絲復古夢幻房間 (Alice’s Room)、淚眼之泉(Pool of Tears)、霓虹燈等地標外,仲有韓國策展人池性旭親自設計嘅全新打卡秘境𠻹!

 

打卡位10:巨型愛麗絲充氣娃娃

愛麗絲一向比人嘅印象都係好可愛,但呢個巨型愛麗絲充氣娃娃身型豐滿、表情盞鬼,真係喜感十足!

打卡位11:愛麗絲復古夢幻房間

走入愛麗絲復古夢幻房間,入面一片綠油油,佈滿紅綠交織嘅花草植物同木製傢俬,好似去咗自己嘅 Dream Room一樣!

打卡位12:淚眼之泉

另一邊廂嘅「淚眼之泉」以影像、投影、燈光、立體裝置等等不同媒體,營造出神秘感覺。讓人淪陷喺藍色淚海嘅迷幻中,以赤子視覺感受愛麗絲嘅虛幻異想世界。

 

Alice’s Adventure @ Starlight Garden夢遊奇幻聖誕
日期: 11月27日至1月13日
時間: 中午12時至晚上10時
(14/12/18 – 1/1/19逢星期五、六、日及公眾假期延長至晚上11時)
地點: 沙田新城市廣場一期7樓星光花園

 

2018 聖誕好去處

【聖誕好去處】拍拖必去!精選 12大浪漫打卡點

【聖誕好去處】葵芳超浪漫5大打卡位!24呎高水晶聖誕樹+霓虹燈玫瑰牆+粉紅Cafe

【聖誕好去處】愛麗絲入侵沙田星空花園!12大玩味打卡位

【聖誕好去處】走入荔枝角仙氣森林!螢火蟲x飄雪下浪漫打卡

 

更多一日遊路線!

長洲 1.5 日單車美食懶人包!食盡 7大小食 + 張保仔洞探險

港版小清境 – 塔門一日遊!食海膽炒飯 + 大草地放風箏

由黃大仙走到九龍城! 半日遊深度體驗香港傳統文化

情侶放閃必去!精選 10大假日輕鬆好去處 (上集)

情侶放閃必去!精選 10大假日輕鬆好去處 (下集)

 

睇更多拍拖好去處!
FB page: 依莉“詩”生活
美食 IG: ErieDiary
打卡 IG:ErieDiaryhk
網址:ErieDiary.hk
YouTube:ErieDiary


About 依莉詩

網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。