旺角另類掃街!蛋黃哥美食街 x 全新雞動哥+蛋黃兒限量精品

蛋黃哥喺朗豪坊 hea 咗成個夏天~好似都仲未抖夠!今次仲帶埋新角色雞動哥同蛋黃兒齊齊食住hea~呢條美食街啲小食款款都有蛋黃哥嘜頭,好鬼正!我 依莉詩 愛佢愛到要食埋落肚啦!

雞動哥蛋黃兒萌爆登場

蛋黃哥除咗蛋黃人原來都有其他朋友,就係性格同佢完全相反嘅「雞動哥」同可愛度爆燈嘅「蛋黃兒」!佢哋 3隻蛋齊齊喺美食街亮相,真係好想攬住佢哋呢!

▲ 咪睇「雞動哥」一副懶怒樣,但一身毛茸茸嘅佢其實都幾萌㗎!而佢最愛孭住背囊通處跑,同蛋黃哥heahea吓嘅性格好唔同呢!

▲ 「蛋黃兒」戴住草帽非常可愛,而且仲好細心𠻹!佢喺烈日當空非常盡責,照料住雞蛋們,免得大家一秒變熟蛋!

7大梳乎美食超吸引

要食卡通美食多數都要去主題餐廳,但今次係呢條美食街就可以一次過掃齊 7大美食品牌嘅蛋黃哥小食同甜品,企係度食嘅又有,坐低慢慢食嘅都有!最平 $18 有交易,想打卡又想食嘢都係豐儉由人!「山下菓子
」有卡通美食唔出奇,但最正係今次限量雪條同砵仔糕都送埋個模,食完可以拎返屋企DIY!而欣宜星級曲奇「Homie Cookies」出嘅鹹蛋曲奇同芝士撻更加鹹香十足,我就一試愛上!日式甜點「i Cremeria Café」仲推出蛋黃哥赤肉蜜瓜下午茶,$138仲有蛋黃哥芝輕蛋糕、赤肉蜜瓜同雪糕同咖啡,以呢間名店嚟講,簡直就係十個抵!

▲ 梳乎棉花糖流心芝士鹹蛋黃撻 $25

上面白雪雪嘅蛋黃哥原來係棉花糖,軟綿綿口感好得意,而芝士撻加上陣陣鹹蛋香味,將芝士撻帶到另一層次!

▲ 梳乎鹹蛋黃軟曲奇 $25

鹹蛋黃軟曲奇上面粒粒鹹蛋,同樣陣陣鹹蛋香味,超好味!

▲ 漲卜卜梳乎香腸 $20

香辣蜜糖雞肉腸上面印有蛋黃哥萌樣,好似叫係唔好食佢咁,好搞笑!

▲ 梳乎巨型砵仔糕 $40

「山下菓子」今次推出港式梳乎懷舊三寶,梳乎懷舊大菜糕 ($50)、 梳乎經典糖蔥餅 ($20) 同 梳乎巨型砵仔糕 ($40)。雖然有少少貴,不過有蛋黃哥嘜頭乜都抵返啦!食完砵仔糕,仲可以拎埋模返屋企,留返新年DIY年糕都得!

 

▲ 其他唔係獨家產品都好靚,好似呢個布甸樽就好可愛啦!

▲ 隔離滿記都有好多甜品,好似梳乎奶蓋芒果冰 $49 (左2) 就喺芒果冰上加上雪白芝士奶蓋,絕對係夏天一大享受!仲有細細隻梳乎蛋布甸 $18 (左1) 同 梳乎楊枝甘露 $49 (右2) 見到蛋黃哥個梳乎樣真係唔捨得食!

 

▲ 梳乎蛋芒果蛋糕 $68

日式甜點「i Cremeria Café」出嘅芒果慕斯海綿蛋糕唔止樣靚,味道亦有一定保證!

▲ 梳乎仲夏乳酪雪糕 $78

呢杯乳酪雪糕夾住層層新鮮芒果,口感清新。上面大大樣向你招手嘅蛋黃哥,造型滿分!

梳乎限定店優先發售雞動哥、蛋黃兒系列

喺4樓食得差唔多,粉絲們係時候去 7樓梳乎限定店shopping!今次最特別係優先發售嘅Gudetama +「雞動哥」、「蛋黃兒」系列。個個戴住廚師高帽,好醒精呢!

▲ Gudetama 公仔匙扣 $176/個

3隻蛋嘅 style 都好唔同,都又好夾咁!

▲ Gudetama 匙扣 $55/個

鎖匙扣都好得意㗎!蛋黃哥粉絲一定要儲啦!

▲ Gudetama 豉油碟 $38.5/隻

豉油碟每隻只係 10.5cm,size唔大方便收藏,仲可以放細細件雞蛋料理喺上面𠻹!

Gudetama梳乎遊記最終章:梳乎美食遊
日期: 即日起至2018年9月2日 (上午11時至晚上11時)
地點: 朗豪坊4樓通天廣場

 

更多一日遊路線!

長洲 1.5 日單車美食懶人包!食盡 7大小食 + 張保仔洞探險

港版小清境 – 塔門一日遊!食海膽炒飯 + 大草地放風箏

由黃大仙走到九龍城! 半日遊深度體驗香港傳統文化

情侶放閃必去!精選 10大假日輕鬆好去處 (上集)

情侶放閃必去!精選 10大假日輕鬆好去處 (下集)

 

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie


About 依莉詩

網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。