依莉詩 in ETV胃食四處尋

沙田食正宗澳葡菜！脆卜卜葡式乳豬 + 滋味芝心馬介休球

沙田新城市廣場一期地下最近一次過開咗幾間新餐廳，其中一間係食澳葡菜，聽聞嗰度嘅馬介休球同乳豬好好食。而我依莉詩第一次接觸澳葡菜就係馬介休球，嗰陣係姨媽帶我去福隆新街食㗎！既然香港都可以食到，梗係要試吓啦！

講番澳葡菜，其實就係喺澳門嘅葡國人用澳門嘅食材做嘅家鄉 Function 菜，好似西餐又好似中國菜。同樣係鹹魚、乳豬同乳鴿，都風味都同平時酒樓食嘅好唔同㗎！

▲ 亞蘇爾小食拼盤 (2人用) $162

呢個小食拼盤份量好足，有芝心馬介休球、辣肉腸芝士批脆多士、霹靂魷魚、黑醋豬手同香草烤意瓜，樣樣都好有特色！

芝心馬介休球：結合馬介休魚肉同芝士兩樣鹹鹹香香嘅食材，比傳統只有魚肉嘅馬介休球更有層次，中間嘅芝士有拉絲效果𠻹！

辣肉腸芝士批脆多士：勁多芝士，加上辣肉腸粒，單睇外表已經非常吸引，中間仲有黑松露醬，好惹味！

霹靂魷魚：魷魚彈牙，開胃酸辣，份量少少，好想食多幾舊。

黑醋豬手：豬手係冷盤，有滿滿骨膠原感覺。唔會太腍，太滑，反而好彈牙，好爽口。

香草烤意瓜：放喺多士底，有啲似伴碟，亦因為吸咗多士嘅油，所以都有少少油膩。

▲ 葡式香烤脆皮乳豬件配薯菜 $188

葡式乳豬同燒味好唔同，皮雖然無食開嘅乳豬皮咁脆卜卜，不過肉比較多，食落更有層次。

▲葡式乳豬嘅肉比較厚身，而且唔肥膩。

▲ 至尊鵝肝焗鴨飯 $158

焗鴨飯加上辣肉腸，濕濕哋，質地似意大利飯，味道相當惹味，有少少似臘味飯。鵝肝上面灑滿芝士粉，成個飯都好特別。

▲ 焦糖葡撻 $14

撻皮酥脆，蛋都好滑，不過晚市唔係即焗，略嫌唔係好夠熱。

▲ 除咗原味，仲有咖啡葡撻同鮮橙檸檬葡撻，大家可以試吓！

▲ 雞尾酒特飲值得一讚，「澳門塔」漸層藍色加上雪葩吸睛又清爽，而「玫瑰堂」酒味重，又有水果味，兩杯都好啱夏天飲。

亞蘇爾

地址：沙田沙田正街18號新城市廣場1期1樓107號舖

各區美食精選！

睇更多拍拖好去處！
FB：依莉“詩”生活
IG： ErieDiary
網址：ErieDiary.hk
YouTube：Diary Erie

沙田澳葡菜澳門菜葡國菜葡式乳豬馬介休球

依莉詩 :網媒出身嘅 90後，抱住「試咗先講」嘅精神。終日飲飲食食、遊走各大商場、小店尋找好去處。