食自助餐最易回本就係食海鮮，今次我 依莉詩 就去咗荃灣食呢個「亞太海鮮盛宴」自助晩餐，無論冷盤嘅阿拉斯加蟹腳、鮮甜刺身，定係熟食嘅珍寶焗蠔、原隻粉絲蒸扇貝、焗蟹蓋，差唔多碟碟都係海鮮，樣樣都想食，好吸引！
睇著荃灣靚景！食高質頭盤
好多時海鮮自助餐都會好多人食，唔知係咪因為平日，意外地如心海景酒店嘅 Café Circles 就無乜人，坐喺窗邊可以靜靜地180 度飽覽荃灣同藍巴勒海峽。望住靚景，食住每人贈送嘅頭盤 – 香煎鴨肝伴芝士白汁焗開邊龍蝦，都幾有食西餐嘅 feel！如果訂8位或以上，仲送巨型肉眼扒一客𠻹！單單食呢兩樣，再食埋珍寶蠔同長腳蟹就已經值回票價呢！
▲ 呢個頭盤一啲都唔 hea，擺得靚之餘，鴨肝煎得內脆外軟，而龍蝦爽彈多肉，一開始食已經有高評價。
冷熱海鮮齊集！極易回本
入到正題，自助餐部份都唔輸蝕！冷盤嘅亞拉斯加蟹腳、雪場蟹腳、龍蝦仔、凍鮮蝦、翡翠螺同青口都幾新鮮，而熱食都有好多選擇，當中最吸引我嘅就係珍寶芝士焗蠔，就算熟咗都大過手掌，就係夠晒誇張！另外，仲有沙爹肉蟹煲、原隻粉絲扇貝同籠仔荷葉蒸龍脷柳，完全滿足到我呢個海鮮愛好者。
▲ 呢隻珍寶芝士焗蠔，熟咗都大過手掌，就係夠晒誇張！不過唔知係咪有啲煮太熟，有隻前半斷好滑好creamy，都有個位就有少少韌呢！
▲ 凍盤都好新鮮，而且唔使同人爭食！
▲ 一隻隻小龍蝦排排坐等你食！
▲ 蟹腳有兩種，亞拉斯加蟹腳比較鮮甜，雪場蟹腳比較重海水味，肉質都結實彈牙。
▲ 和食區有三文魚、八爪魚、吞拿魚、甜蝦及北寄貝等刺身，亦有壽司、冷麵同中華沙律。
▲ 熱食種類都好多揀，呢個串燒海鮮酸酸辣辣就夠開胃。
▲ 前菜類都有雜肉腸、蟹肉啫喱、海鮮紫菜蛋卷、炸魚粒配蜜桃醬、豬肉啫喱、甜酸齋上素，選擇都幾多。
▲ 就算唔食海鮮都可以撩叉燒、燒肉、燒鵝、海蜇等燒味。
甜品選擇不多但用料十足！
講到我摯愛嘅甜品 ，選擇雖然唔多，不過用料十足，當中我最欣賞栗子蛋糕，就算喺西餅店買都好少有咁多栗子蓉，而且仲好幼滑𠻹！而冰糖杏仁蛋白燉奶都係必食，一盅盅上，又甜又滑！另外仲有意大利芝士布甸、綠茶芝士餅、香橙慕絲蛋糕、伯爵朱古力奶凍等等，大部份都好食，唔伏！
▲ 呢件朱古力蛋糕入面有綿花糖，一啖有齊又脆又軟綿綿口感，好得意！
▲ 甜品唔係好多選擇，而且無點 refill，不過件件都高質唔伏！
▲ 最尾梗係要食埋 Haagen-Dazs 雪糕作完美句號啦！
Café Circles 「亞太海鮮盛宴」自助晚餐
星期一至四：成人 (每位) $428 、小童/長者 (每位) $358 (另加一服務費)
星期五至日及公眾假期：成人 (每位) $478、小童/長者 (每位)$388 (另加一服務費)
地址:香港荃灣楊屋道 8 號如心海景酒店暨會議中心 9 樓
訂座:2280 2868
各區美食精選！
旺角慢煮快食新體驗！6間中日泰美食登陸彌敦道 700號｜北海道拉麵X清邁咖喱麵
地膽帶路！土瓜灣街頭小食 – 足料花膠魚肚粥 + 濃香米香腸粉
地膽推介！$150 掃盡 5大紅磡街頭小食 – 混醬班戟麵條 + 超大粒手製芋圓
死場不再！10間平民食肆進駐荃灣新 Food Court – 嫩滑手撕雞腸粉 x 醒胃麻辣串
粉色系呃 like 甜品團！食盡荃灣 3大潮食店 – 玫瑰士多啤梨窩夫 X 山形縣白桃厚班戟
大坑 2大呃 Like 甜品！ 粉色棉花糖燒 x 彩虹沖繩鹽刨冰
5萬呎水產市場登陸黃埔！九號水產 4大食店率先睇 – 蟹痴必掃北海道皇帝蟹
旺角 1日 4餐，由朝食到晚！青檸烏冬係劣食？韓系日式吉列牛一定正？
銅鑼灣 SOGO 地庫重開！5大人氣日本過江龍進駐 必食香脆海鮮煎餅 + 鹿兒島彈牙魚餅
元朗 4大人氣食店！必食北海道布丁燒 X 啖啖肉無骨雞翼包
屯門潮食集中地！紅橋 4大不得不吃的小食+主菜+甜品
睇更多拍拖好去處！
FB： 依莉“詩”生活
IG： ErieDiary
網址：ErieDiary.hk
YouTube：Diary Erie