仲有幾日就到聖誕，我 依莉詩 咁鍾意浪漫，當然要出動，去均全港九嘅靚靚商場佈置影相啦！喺呢兩個月入面去咗差唔多 20個聖誕佈置，今次就精選 12大我最鐘意嘅打卡點畀大家，等各位聖誕帶另一半去嘅時候唔會撞板啦！
聖誕打卡位1：
香港嘅冬天唔會落雪，但上到 D2 Place 嘅天台一樣有飄雪！雖然呢個聖誕打卡點好似年年都差唔多，不過今年隔離嘅 D2 Place 二期就有好大嘅驚喜！繼上年嘅光影藝術展覽後，今年打造咗個神秘螢火蟲森林，既夢幻又神秘，我 依莉詩 覺得呢個係今個聖誕最值得去嘅情侶拍拖景點呢！而家就一齊去揭開森林神秘面紗，尋找冬螢足跡啦：【聖誕好去處】走入荔枝角仙氣森林！螢火蟲x飄雪下浪漫打卡
《螢の森 The Forest Light》
日期：2018年12月1日至2019年1月20日 (逢星期一暫停開放，12月24日及31日除外)
時間：中午12時至晚上9時
地點：D2 Place 二期 The Garage (G/F)
聖誕打卡位2：
每年沙田新城市廣場都係聖誕燈飾嘅重頭戲！今年以愛麗絲主題少咗份浪漫，多咗點玩味！雖然唔似以前燈海處處，但每個影相位都打晒燈，就算用手機，唔識取景都已經可以影到靚相！就等我 依莉詩 同大家分享吓有咩靚靚打卡位啦：【聖誕好去處】愛麗絲入侵沙田星空花園！12大玩味打卡位
Alice’s Adventure @ Starlight Garden夢遊奇幻聖誕
日期： 2018年11月27日至2019年1月13日
時間： 中午12時至晚上10時
(14/12/18 – 1/1/19逢星期五、六、日及公眾假期延長至晚上11時)
地點： 沙田新城市廣場一期7樓星光花園
聖誕打卡位3：
記得葵芳新都會廣場上年重新裝修完第一炮就係聖誕燈飾，當時嘅聖誕花海就係好靚，今年都無令人失望，聖誕花換成4色玫瑰花，再加上粉紅色嘅歐式Rosy Pop-up Café，日頭歎住下午茶賞花很不錯。一到夜晚，24呎水晶鏡房聖誕樹、燈光閃閃星光隧道同霓虹燈牆就更加係一流打卡位呢：【聖誕好去處】葵芳超浪漫5大打卡位！24呎高水晶聖誕樹+霓虹燈玫瑰牆+粉紅Cafe
Christmas Rosemance玫瑰花之園
日期：2018年11月10日至2019年1月1日
時間：上午10時至晚上10時
地點：葵芳新都會廣場L3-L4露天廣場
玫瑰吹雪效果時間：逢星期日3時及5時
玫瑰燈光匯演：每晚6時正、7時正、8時正、9時正及10時正，全長約3分鐘
聖誕打卡位4：
雖然係就係逼啲，但作為香港人唔去過尖沙咀至尖東帶又點叫過聖誕！今年海港城就用樂多LED燈整咗條40米長嘅聖誕大橋同60呎高巨型戶外聖誕樹。只要捐少少錢，仲可以走入巨型萬花筒打卡或者買個愛情鎖許願𠻹！
海港城燈光匯演
日期：2018年11月16日至2019年1月1日
時間：晚上6時至10時（每逢正點、30分開始)
地點：尖沙咀海港城海運大廈露天廣場 (近尖沙咀天星碼頭五支旗桿)
聖誕打卡位5：
去完海港城梗係行埋去1881啦！今年1881中庭佈置好似弱雞咗，唔行大bear bear 、旋轉木馬呢啲可愛路線，反而擺放華麗嘅皇冠舞台配歐陸風格建築！不過無論點，天台都係一樣充滿浪漫氣氛！
1881 Heritage
日期：即日至2019年 1月1日
時間：晚上7點至12點
地點； 尖沙咀廣東道2A號
聖誕打卡位6：
今年似乎少咗卡通人物嘅聖誕佈置，而荃灣廣場就用咗布甸狗做主題！中庭嘅布甸狗聖誕部屋超可愛，布甸狗穿梭部屋嘅客廳及廚房等角落。天台仲有星光隧道同巨型布甸狗，鍾意布甸狗嘅朋友，唔好錯過！
荃灣廣場．Pompompurin 部屋聖誕派對
日期：2018年11月9日至2019年1月1日
時間：早上10:30至晚上10點
地點：荃灣廣場L1中庭、L5太空樂園、B1樓層
聖誕打卡位7：
之前熱爆台灣嘅《色廊展Color Gallery》登陸香港！不過就分佈喺荃灣、沙田、元朗、將軍澳幾個唔同商場，變相每個展都唔係好大。去完睇布甸狗可以順路去荃灣千色匯呢個橘色小食部，當中嘅橘色波波隧道都幾有型㗎！
KOLOUR「色廊」主題裝置及展覽
地點：荃灣千色匯I
時間：上午10時至晚上10時
聖誕打卡位8：
朗豪坊有好多好多換上聖誕裝嘅 Tsum Tsum。最吸睛係懸掛喺半空嘅11個巨型燈泡氣球，夜晚睇勁有feel。而中間就有4.5米高、由22個角色疊砌成嘅聖誕樹，同Tsum Tsum 市集，有700款限定商品賣。雖然影相位唔多，但好靚好有歡樂氣氛！懷念以前手機遊戲不離手嘅日子！
迪士尼《TSUM TSUM 聖誕市集》
日期：2018年11月14日 – 2019年1月6日
時間：上午11點至晚上11點
地點：旺角亞皆老街8號朗豪坊商場
聖誕打卡位9：
銅鑼灣皇室堡、東角LAFORET同銅鑼灣地帶就有可愛嘅My Melody 換上小紅帽聖誕裝，同大家一齊開音樂會。當然，皇室堡中庭嘅佈局係最吸引！
My Melody 聖誕聲夢小鎮
日期： 2019年11月18日至2019年1月1日
時間： 上午10時至晚上10時
地點： 皇室堡地下中庭及1樓
聖誕打卡位10：
一直鍾情聖誕節嘅微型擺設，會郁、有音樂、有燈嘅旋轉木馬、飛天韆鞦，每一樣都好夢幻，勁有聖誕氣氛！而今次 Time square 嘅微型展更加充滿香港特色，一個個昔日香港人過聖誕嘅情景重現眼前。
時代廣場 微妙聖誕展覽
日期：2018年11月24日至2019年1月1日
時間：上午10點至晚上10點
地址：銅鑼灣時代廣場
聖誕打卡位11：
色廊展另一個展區喺馬鞍山新港城中心。當中以浪漫香檳金色作主要色調，金光閃爍、充滿節日氣氛！除咗懷舊嘅八十年代台式的士高佈置，仲有個萬花筒隧道。平時如果唔係media day去商場好難影到靚相，但馬鞍山比較遠人唔算多，而且安排幾好，條隧道每一組人影5分鐘，有保安用計時器計時，夠晒公平，可以放心影，唔怕阻到人同比人阻住！
「炫金聖誕歡『樂』派對」活動詳情
日 期：2018年11月5日至2019年1月2日
時 間：上午10時至晚上10時
地 點：馬鞍山MOSTown新港城中心L2天幕廣場（港鐵馬鞍山站B出口）
▲ 隔離馬鞍山商場啲佈置細細哋👻不過有Keroppi加持都唔錯！
聖誕打卡位12：
最後係利東街，佈置都掛係上面，人又多，好難影到靚相，但以倫敦攝政街（Regent Street）著名嘅「The Spirit of Christmas」做主題，原汁原味咁將英倫風格裝飾帶到香港！有天使👼🏻有飄雪❄️仲有聖詩🎹好似去咗迪士尼小鎮大街咁🤗勁有聖誕氣氛！
利東街「The Spirit of Christmas」
日期： 2018年11月16日－12月31日
地點：香港灣仔利東街
更多一日遊路線！
長洲 1.5 日單車美食懶人包！食盡 7大小食 ＋ 張保仔洞探險
【延伸閱讀】
