有啲地方男仔永遠都唔明白女仔點解會咁想去，不過就係咁先變咗女士們嘅秘密天地！好似灣仔最近新開嘅「ULURU Cuisine」，以純白歐陸風格嘅餐廳，牆上畫滿黑白色嘅手繪，就好似置身童話繪本世界一樣，充滿歡樂氣氛，絕對係同閨密傾計打卡嘅好地方！我 依莉詩 當然要趁放假，去食個 Brunch啦！
走入黑白手繪世界
估唔到而家唔使去深圳，灣仔都有一間靚靚嘅打卡 Cafe，全店裝修都係以黑白色為主，店內每幅牆上壁畫都由一班大學生親手繪畫，用黑白簡約線條勾勒出歐洲嘅街道同大宅輪廓，當中嘅櫥櫃、書櫃、梳妝台等，配合真實嘅純白色傢俱，令人有錯覺自己都係手繪世界嘅一部份，更容易投入其中。
打卡位1：通往童話的長樓梯
餐廳係利東街隔離嘅春園街，因為門口唔係面前大街，所以比較難發現，好彩門口外牆就已經有黑白繪畫，所以都容易認。入到門口，最令人驚喜就係一條長長嘅白色樓梯，兩旁同樣畫滿手繪，一路行上去就好似愛麗絲慢慢走入童話世界一樣，非常興奮！
▲ 窄長嘅白樓梯簡約清新，好似童話世界嘅路！
▲ 因為中午去比較少人，喺樓梯上影相都唔怕阻到其他食客，可以盡情影長腿照！
打卡位2：專屬的化妝間
入到餐廳係一個好似化妝間嘅影相位，牆上畫咗梳咗枱，配埋真實嘅鏡同凳，就好似要呼喚大家為影靚相做好準備！
▲ 近影就好似女生嘅扮靚小天地。
▲ 另一邊牆畫滿糖果同花，突然好想為佢哋填上顏色呢！
打卡位3：黑白的秘密走廊
未坐低想先去過洗手間，發現餐廳有兩個大廳，中間由一條長長嘅走廊分隔。當然兩邊都係不同主題嘅黑白手繪。而最估唔到就係黑白手繪當中，隱藏咗通往男女洗手間之門！
▲ 喺呢條長長走廊影相一樣有 Feel！
打卡位4：只有你的私家座位
影咗咁耐係時候坐定定，餐廳比起一般香港嘅樓上 Cafe 大，座位款式有好幾種，Bar枱、二人枱、多人長枱都有，而且位同位之間好寬落。無論想一個人享受寧靜下午，同閨密傾計歎茶、三五知己開生日 Party 都好合適呢！
▲ 多人嘅可以坐長枱，被純白色梳化包圍，自成一角。
▲ 坐Bar枱亦有另一番風味。
▲ 小小嘅二人枱就啱晒情侶或者閨密談心、傾密計。
打卡與味道兼備的主食與甜品
雖然係打卡 Cafe ，但食物同飲品都花盡心思，唔止賣相精緻，連味道食物水平都唔錯。餐廳主打西式 fusion 菜，Lunch Set 選擇大約有 8 款，一百蚊左右連餐湯同麵包，都唔算太貴。如果想影靚相，我推介大家一定要加錢轉特色花茶，凍花茶入面有朵可食用嘅玫瑰花，打卡一流！當然甜品就更加唔使講，每一款嘅貌相都好睇得！
▲ 跟餐嘅湯同麵包份量唔多，啱女士們嘅份量。
▲ 港式 All Day Breakfast $128
呢個 All Day Breakfast 好特別，除咗平時都見到嘅德國腸、炒滑蛋同煙肉外，仲加咗香港嘅特色小食 – 雞蛋仔同 XO腸粉。當中黑松露炒蛋有淡淡黑松露香，都幾滑，而 XO腸粉亦都好惹味。雖然份量唔多，不過都夠飽肚。
▲ 香煎澳洲肉眼配黑松露紅酒汁 $128
肉眼算大塊，肉質軟腍，而黑松露紅酒汁味道濃郁，幾配牛肉。野菜亦灼得啱啱好，爽口清新。
▲ 5成熟肉眼軟腍有肉汁，百幾蚊算抵食！
▲ 粉碟花之丘 $78
去得打卡 cafe，甜品梗係重點！呢個「粉碟花之丘」用人手即製嘅糖膠做花盆，入面放滿 brownie 、 chocolate crumble 同 cream，仲有多款可食用花，色彩繽紛，賣相滿分！
▲ 特色花茶 (套餐+$28)
特色花茶係玫瑰花茶，配上可食用玟瑰同香草，飲落散發淡淡玫瑰清香，清甜解渴。
▲ 特色咖啡 (套餐+$28)
特色咖啡除咗拉花，連杯邊都特別用朱古力裝飾過，苦中帶甜，非常吸引。
▲ 以 lunch 西餐嚟講，呢度價格算正正常常，不過有咁靚嘅環境，已經心滿意足啦！
ULURU Cuisine
地址：灣仔春園街1-11號春暉大廈1樓
營業時間：11:30am-11pm
電話：2366 6448
各區美食精選！
佐敦美食精選！街坊都食嘅懷舊點心糕品+台灣人氣黑糖珍珠奶
旺角慢煮快食新體驗！6間中日泰美食登陸彌敦道 700號｜北海道拉麵X清邁咖喱麵
地膽帶路！土瓜灣街頭小食 – 足料花膠魚肚粥 + 濃香米香腸粉
地膽推介！$150 掃盡 5大紅磡街頭小食 – 混醬班戟麵條 + 超大粒手製芋圓
死場不再！10間平民食肆進駐荃灣新 Food Court – 嫩滑手撕雞腸粉 x 醒胃麻辣串
粉色系呃 like 甜品團！食盡荃灣 3大潮食店 – 玫瑰士多啤梨窩夫 X 山形縣白桃厚班戟
大坑 2大呃 Like 甜品！ 粉色棉花糖燒 x 彩虹沖繩鹽刨冰
5萬呎水產市場登陸黃埔！九號水產 4大食店率先睇 – 蟹痴必掃北海道皇帝蟹
旺角 1日 4餐，由朝食到晚！青檸烏冬係劣食？韓系日式吉列牛一定正？
銅鑼灣 SOGO 地庫重開！5大人氣日本過江龍進駐 必食香脆海鮮煎餅 + 鹿兒島彈牙魚餅
元朗 4大人氣食店！必食北海道布丁燒 X 啖啖肉無骨雞翼包
屯門潮食集中地！紅橋 4大不得不吃的小食+主菜+甜品