佐敦美食精選!街坊都食嘅懷舊點心糕品+台灣人氣黑糖珍珠奶

2018年好似太忙,拍少咗掃街片,多數都係去下商場,搵下嘢食咁,今年我 依莉詩 好想努力返,做更多原創內容!好啦~2019年第一條掃街片,就同 大仁生活 一齊由油麻地同尖沙咀中間嘅佐敦出發啦!


佐敦揉合百年老香港風貌

油尖旺一帶大家都唔陌生,亦係開埠前,九龍最旺嘅地區之一,但原來「佐敦」並非正式地名,以前係叫做「官涌」,只係因為地鐵站叫「佐敦」,所以慢慢啲人都咁叫。雖然油尖旺一帶商場同商業大廈林立,但惟獨佐敦保留很多百年風貌,唯人熟悉嘅廟街、露天街市等,可以發現到好多老香港事物。當然,美食方面都有好多,米芝蓮級數嘅就有「十八座狗仔粉」同「佳佳甜品」,而今次就介紹下大排檔點心啦!

 

精選美食 1:港式大排檔風味    食盡懷舊點心

新填地街嘅露天街市兩旁有唔少以綠色鐵閘圍住嘅大排檔,今次介紹嘅就係只開上晝嘅「波記咖啡」,呢度結合咗茶樓同茶餐廳嘅風格,有點心食但就唔會有人問你「飲咩茶」,反而有咖啡奶茶、檸茶檸水同碟頭飯,大家都快食快走,完全合乎香港人要快同識變通嘅個性。食物唔止有「香港味道」,而且都係「街坊價」,好有本土情懷。

▲ 布拉腸粉 $20-$23

「波記咖啡」最出名就係布拉腸粉,即叫即整,腸粉皮晶瑩通透,仲好嫩滑。Peter 師傅功夫純熟,喺大大個蒸爐前,輕輕鬆鬆就捲出皮薄餡多嘅腸粉。師傅推介牛肉腸粉,又滑又腍,而我鍾意食蝦腸,一啖一隻蝦,蝦肉彈牙、足料新鮮!

 

▲ 蟹籽燒賣 $18

有點心賣嘅地方又點會冇燒賣,呢籠燒賣就好有實實在在嘅肉味,食落好彈牙,真材實料呢!

▲ 雞球大包 $14

大包以前嚟講係將啲下欄嘢放埋一齊,貪抵食夾大件。當然到今時今日就唔係下欄嘢啦,但就一樣抵食夾大件!呢個雞球大包唔單止大過我塊面,入面又有肉餅,又有叉燒,仲有咸蛋黃,啲料嘅汁索晒入個包度,食一個都夠晒飽!

▲ 梅菜蒸鯇魚 $40

午餐嘅蒸飯用鐵盒裝,好有懷舊味道,而梅菜蒸鯇魚更有家常便飯嘅感覺。

▲ 古法馬拉糕 $9

馬拉糕鬆軟得嚟,有實在感,仲好重黃糖味,係童年嘅味道,不過個膠兜就好似有少少敗筆。

波記咖啡
營業: 06:00 – 15:00(星期日休息)
地址: 油麻地新填地街35-39號新填地街熟食小販市場地下1-2號檔
電話: 23324285

精選美食 2:家庭式糕品鋪重開    日日排長龍

食完點心,行兩個街口就到上海街,有一間以家庭式經營嘅糕品鋪,由選料、製作、出售都由店主一家親力親為。據聞方太糕品舖開咗好多年,但曾經休業,上年先搬到現址重開,但人氣不減,佢出產嘅白糖糕、砵仔糕、紅豆糕等 10幾款懷舊糕點,都用料十足,難怪,日日大排長龍,深受街坊歡迎!

▲ 糕品大部份都係 15元3件。我哋分別買咗龍眼紅棗糕、馬蹄糕、馬豆糕、綠茶糕、綠豆糕 同 白糖糕。綠茶糕好香椰汁味,食落有少少綠茶苦澀,十分特別。

▲ 除咗馬豆糕咁啱切咗舊無豆嘅畀我之外,其他都用料十足。綠豆糕就有密密麻麻嘅綠豆喇!

▲ 馬蹄糕都好多馬蹄,爽口清新。

▲ 龍眼紅棗一樣味道夠有淡淡紅棗清香。

▲ 白糖糕唔酸,有口感,真係難得一見!

方太糕品舖
地址: 佐敦上海街196號地下
電話: 98216598

精選美食 3:台灣過江龍飲品店    明火現煮黑糖珍珠

近排台式飲品店開到成行成市,但原來台灣淡水嘅人氣珍奶李圓圓靜靜雞喺佐敦開咗首間香港分店。李圓圓主打明火煮黑糖珍珠,粒粒Q彈煙韌,而且用明治奶沖製,奶味濃郁。除咗黑糖珍珠系列,搭配鮮奶/紅茶/綠茶,仲有冬瓜、原茶同冬季限定嘅薑汁產品,冬天定夏天都一樣有得揀!

 

▲ 冬瓜鮮檸檬(左)$22、黑糖珍珠鮮奶綠茶2.0 (右) $33

黑糖珍珠鮮奶綠茶同坊間飲法唔同,要先用飲管攪拌5-6個圈,將上面嘅奶同下面新鮮煮熱嘅黑糖珍珠攪勻先飲,唔止唔會變成奶水,仲有冰火嘅感覺。亦因為黑糖珍珠用明火煮2個鐘,Q彈之餘,咬落去都有黑糖味,而2.0版本嘅鮮奶,比一般產品加多30%,所以奶味更濃。

▲ 黑糖珍珠係用火爐熬煮兩小時,經過燜、煮、燉 三個過程而成,當中會使用唔同風味嘅天然黑糖混合熬煮,非常講究。

李圓圓
地址:佐敦庇利金街38號地下
電話: 64369999

精選美食 4:特長越式法包    醒胃健康之選

食咗咁多嘢,係時候解解飽滯感,越式法包嘅蘿蔔絲就夠晒開胃!呢間馬丁王越式法包鋪頭細細,賣正宗越式法包為主。店名馬丁王係老闆娘“Martine Vuong”嘅名,佢係越南華僑,1968年舉家移居香港後,決定將兒時嘅味道帶到香港。除咗有原條16吋法包,仲有半條同迷你選擇,素食嘅亦可以揀越式素包。

 

 

▲ 馬丁王正宗越式法包(迷你版)$32

越式法包餡料好豐富,有扎肉、熏蹄、腩肉、青瓜、蘿蔔絲同蘿蔔絲⋯⋯無錯!越式法包嘅靈魂就係極酸嘅蘿蔔絲!真係好開胃,哈哈哈~

 

馬丁王越式法包
地址 : 佐敦德興街1號B4地舖
電話: 26583800

 

各區美食精選!

旺角慢煮快食新體驗!6間中日泰美食登陸彌敦道 700號|北海道拉麵X清邁咖喱麵
地膽帶路!土瓜灣街頭小食 – 足料花膠魚肚粥 + 濃香米香腸粉
地膽推介!$150 掃盡 5大紅磡街頭小食 – 混醬班戟麵條 + 超大粒手製芋圓
死場不再!10間平民食肆進駐荃灣新 Food Court – 嫩滑手撕雞腸粉 x 醒胃麻辣串
粉色系呃 like 甜品團!食盡荃灣 3大潮食店 – 玫瑰士多啤梨窩夫 X 山形縣白桃厚班戟
大坑 2大呃 Like 甜品! 粉色棉花糖燒 x 彩虹沖繩鹽刨冰
5萬呎水產市場登陸黃埔!九號水產 4大食店率先睇 – 蟹痴必掃北海道皇帝蟹
旺角 1日 4餐,由朝食到晚!青檸烏冬係劣食?韓系日式吉列牛一定正?
銅鑼灣 SOGO 地庫重開!5大人氣日本過江龍進駐 必食香脆海鮮煎餅 + 鹿兒島彈牙魚餅
元朗 4大人氣食店!必食北海道布丁燒 X 啖啖肉無骨雞翼包
屯門潮食集中地!紅橋 4大不得不吃的小食+主菜+甜品

 

睇更多拍拖好去處!
FB page: 依莉“詩”生活
美食 IG: ErieDiary
打卡 IG:ErieDiaryhk
網址:ErieDiary.hk
YouTube:ErieDiary


About 依莉詩

網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。