依家幾乎部部手機相機都有美肌功能，部部都可以係自拍神器。要「豬扒變女神，象腿變長腿」完全係難度，不過一去到直播拍片就慘變照妖鏡，打回原形。最近神器界手機-美圖推出 T8 手機，不但影相，就連直播都會實時美肌。我依莉詩今日就有幸出席記招，拎上手試玩啦！
耀目藍夠特別，雙 V 設計難單手操作
既然係主打女性市場嘅手機，外型同顏色上都要照顧到襯衫嘅需要。T8 今次選用咗金屬外殼，一體成型，加上魔力橙、玫瑰金、耀目藍、寶石灰嘅珠光效果，十分高貴。而我比較鍾意耀目藍，顏色少有之餘，低光源下會呈現出銀灰色，層次豐富，低調不浮誇 (耀目藍太搶手了，個個記者都鍾意，所以借了玫瑰金影，不過我相信你見到實物都係鍾意耀目藍多啲) 。
講到手感方面，因為 T8 繼承咗美圖手機嘅雙 V 設計，即使弧形機背已經比 V4s 無咁界手，但難免都係未能用手指尾托住部電話，對手細嘅女仔嚟講單手拎都係易跣落地。不過咁講，依家唔少大 mon 手機拎上手都係咁，大概買隻 iRing 可以解決呢個問題。
▲ T8 承襲了美圖手機特有嘅雙 V 設計，所以看上去上下兩邊都好寬。
▲ T8 放有 nano-SIM 卡插槽同電源鍵，不過可能要設計得比較薄，所以唔支援 microSD 卡擴充同國產機多數有嘅雙卡功能。
低光自拍無油畫，素顏直播都唔怕
大家都知 T8 並唔係美圖出嘅第一部手機，V4s 同 M6 幾個月前我都拎上手試過，評價亦不是太好 (想知 Google 下 「依莉詩 美圖」吧！)，到底呢部仲有咩值得講呢？原來今次 T8 主打自拍新科技，前鏡頭加入 OIS 光學防手震、Dual Pixel 對焦技術同 AI 技術。進一步實現直播美肌，等你任何時候都保持「最佳狀態」。(不過今次時間有限，試唔到直播嘅美肌功能會唔會有延誤，有機會真係要認真試下。)
▲ 女仔通常都用前鏡自拍多過後鏡影相，T8 主相機有2,100 萬像素同雙色溫補光燈，而前鏡當然亦有番咁上下，1,200 萬像素，配合Sony IMX362 感光元件、F1.8 光圈同智能補光燈，係昏暗環境都好清晰。
▲ 新嘅 AI 美顏會根據不同嘅人臉、年齡、性別定制出不同嘅美顏方案，所以無再出現男女合照時，男嘅美顏過度嘅情況。而且就算唔係正面，都同樣偵測到，一樣有美肌。
▲ 今次嘅美肌自然咗，頭髮都好清楚，做到「應朦則朦」嘅效果，唔再好似之前咁犧牲相片清晰度。至於大眼方面都乎合比例，唔怕變蛇精。不過「照騙」始終係「照騙」，雖然自然咗，但仲認唔認得係自己就另一回事了。
▲ 主鏡頭係昏暗環境下都好清晰，近攝亦有立體感。
後製美顏多選項，象腿變美腿無難度
除咗前期美肌，後製都相當重要。同美圖 App 一樣，後製有超多選項，輕則去斑去暗瘡、淡化黑眼圈、美白牙齒，重則五官立體化，甚至連增高都有，可以影完先慢慢執，想點整就點整。
▲ 呵呵，由象腿變美腿都無難度！
依莉詩短評
講自拍美肌，T8 比起之前嘅真係進步唔少，能夠做到「應矇則矇」，面部以外都好清晰，唔再犧牲相片清晰度。至於大眼方面都乎合比例，唔怕變蛇精。不過「照騙」始終係「照騙」，雖然自然咗，但仲認唔認得係自己就另一回事了。硬件方面就有啲美中不足，無得換電又無得插卡，而且索價 $4888 有點貴呢！如果有機會真係想試下用佢做直播，睇下係味咁利害啊！
【延伸閱讀】
