旺角波鞋街新開火鍋店!火車高速輸送一人一鍋 + 30款特色湯底選擇

一兩個人打邊爐,除咗去吉野家食一人鍋,又或者去牛涮鍋任食之外,好似無乜好選擇。我 依莉詩 發現旺角最近新開咗間火鍋店,主打一人邊爐,唔單止好似元氣咁用高速火車輸送食材,材料份量都細細碟,可以食多幾款料呢!

一人邊爐唔使搭枱,火車高速輸送火鍋料

既然位置波鞋街新商場,店內嘅裝修都以運動做主題,牆上插畫都印有運動員畫像同佢哋嘅座右銘,感覺好 young 。而且有別於酒樓打邊爐,都係一人一鍋,大家圍住兩層嘅輸送帶坐,唔使同人搭枱。而且點嘢食用平板電腦進行,再用火車輸送,基本上除咗一開始入坐之外,全程都唔使同店員講嘢,啱晒怕羞仔!

 

▲ 每個座位前面都有部平板電腦畀大家點嘢食,點完會用火車送到面前,全程都唔使同店員講嘢,減少好多溝通上嘅出錯。

▲ 因為每條輸送帶只有一架火車,嘢食會直接停係你面前,所以唔會同其他人嘅 order 搞亂。

▲ 攞到嘢食之後,㩒一吓旁邊紅色掣,火車就會番入廚房,全程都好簡單。

 

30款特色湯底 $10起,抹茶雞湯味道意想不到

平時打邊爐都係濃湯、清湯、蕃茄湯,再唔係就係雞湯、皮蛋湯,而呢間 HOTPOT PNP 就有 30幾款湯底,每日8款輪流畀大家揀,由 $10 至 $18 不等。當中有唔少都係未見過嘅組合,好似茶瓜香菜雞湯、意式卡邦尼湯、中式水仙茶湯底,只係聽到都覺得特別。如果兩個人去一個揀「正常」湯底,另一個可以試新嘢,高唔定有意外驚喜呢!

 

▲ 抹茶雞湯 $10

身為抹茶控,見到有「抹茶」兩個字我梗係立即試吓。呢個抹茶雞湯唔算太濃太杰,不過無論咩食材經過洗禮都被染成綠色。睇落好似幾恐怖,不過估唔到佢同牛肉同蔬菜都幾夾,少鹹加少少苦澀味,基本上唔使沾醬汁都已經夠味。不過食得耐,就係有陣澀味係口腔久久不散。

▲ 中式水仙茶湯底 $10(左上)、熱血湯 $10(右上)、星馬叻沙湯底 $18 (右下)

另外餵蚊就點咗相對「正常」嘅星馬叻沙湯底,椰味重,唔算太辣,放廣島蠔同龍蝦落去非常有鮮味,超級正!至於 大仁 佢哋一家就點咗中式水仙茶同熱血湯,想知好唔好食就睇睇佢哋嘅 Blog 吧!

 過百款肉類海鮮火鍋料,烚廣島蠔龍蝦超鮮味

講到火鍋料,逐份點當然無平時啲火鍋餐咁平,每碟由$5 – $68不等,不過選擇亦都多好多,肉類、海鮮、蔬菜同丸類,想食嘅大致上都有。單單肉類已經有 12款,牛、豬、雞都有唔同部位選擇。想平食牛肉有美國西冷 ($15),貴嘅亦可以揀澳洲和牛肩脊($58),豐儉由人。

 

▲ 澳洲和牛肩脊 $58

牛嘅級數同價錢當然有直接關係,呢款澳洲和牛肩脊油花分布均勻,雖然未到入口即溶,但烚一烚就有濃郁嘅牛肉味。

▲ 丹麥豚梅肉 $22

打邊爐都好少食豬肉。呢款丹麥豚梅肉肉味唔算突出,不過都夠腍滑。

▲ 波士頓龍蝦 $58、廣島蠔 $38、帶子、仿蟹捧

海鮮配叻沙湯簡直一流!龍蝦好新鮮,食落啖啖肉。而廣島蠔都好飽滿,鮮味十足!

 

▲ 牛肉芝心丸 $18

$18 得兩粒牛丸好似有啲貴,不過入面暗藏玄機。一啖咬落去芝士爆晒出嚟,比起芝士竹輪更震憾,淡淡芝士味,又十分滑。比起芝心包同芝士竹輪,呢個更加係打邊爐必食!

前菜醬料有驚喜,冰沙子薑皮蛋夠開胃

原來呢度唔止湯底特別,前菜同醬料都一樣有特色。就好似冰沙子薑皮蛋就必定要點!子薑混入冰粒打成粉紅色嘅子薑冰沙,顏色夠晒吸引之餘,食落有冰涼微辣感,好有驚喜!而櫻花蝦伴忌廉芝士甜得嚟又脆口,夠開開胃,特別喺食緊抹茶雞湯嘅時候,可以中和番陣苦澀味。

至於醬料雖然都要額外買,不過有好多特別嘢,好似蜜糖x是拉差、魚露x蜆蚧醬、腐乳x蝦醬x甜豉油,仲有零食脆脆,例如點心麵、玄米粒和鎬巴等。揀一兩樣試吓都未嘗不可。

 

▲ 冰沙子薑皮蛋 $12

子薑混入冰粒打成粉紅色嘅子薑冰沙,顏色夠晒吸引之餘,食落有冰涼微辣感,好有驚喜!

▲ 櫻花蝦伴忌廉芝士 $22

櫻花蝦甜得嚟又脆口,夠開開胃,搭配creamy嘅忌廉芝士,味道變得濃郁。特別喺食緊抹茶雞湯嘅時候,可以中和番陣苦澀味,值得一試!

HOTPOT PNP 熱血一流

地址:旺角奶路臣街17號The FOREST地下G12號鋪

營業時間:11am-11pm

 

旺角 1日 4餐,由朝食到晚!青檸烏冬係劣食?韓系日式吉列牛一定正?

旺角放題 $168 任食海膽壽司!神舍佈置打卡 + 免費寫繪馬

宮崎連鎖居酒屋塚田農場登陸海港城!望住維港嘆「美人」 Tea set

 

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。