【東京】築地場外市場搵美食!蛋香十足玉子燒 + 半塊面大生蠔

3月嘅東京之旅寫極都寫唔完,由當時凍到著 5件衫都仲凍到而家著 1件背心都嫌熱,不過我會堅持寫落去嘅!上兩篇分享完 東京迪士尼樂園 嘅遊記,胃食嘅 依莉詩 我梗係要去港人必去,出名多又平又新鮮海鮮食嘅築地場外市場啦!

場內市場老店多,場外市場小食多

之前一路聽人話築地會搬走,其實築地市場分場內、場外兩部分,預定會搬遷嘅係場內部分,亦即係大大條鮪魚拍賣同著名排好耐隊先食到嘅「壽司大」所在地。因為要去場內市場都要好早去起身,清晨 5點鐘去到都仲可能要排幾個鐘先有得食。懶懶閒嘅我就決定上午去場外市場食早餐就好了!場外市場店鋪都比場內開得晏,我哋 10點去到大部份都係開店唔係好耐,不過都有好多小食店同壽司鋪,一樣可以滿足到食新鮮刺身嘅慾望。

 

▲ 場外市場計劃會係 2020年東京奧運之前改成美食圈,所以呢度除咗廚具、乾貨食材,有好多小食檔同食店。其求揀一間都平過係香港食同級數嘅餐廳呢!

▲ 厚厚嘅甜玉子充滿蛋香,上面淋咗好多蘿蔔蓉增加多種口感,100円一串咁抵,嚟得築地一定要食玉子燒呢!

▲ 街頭仲有燒海膽帆立貝、原隻燒龍蝦等,只係聞吓都覺得香!

▲ 隻蠔有我半塊面咁大都係 500円咋!又肥又重海水味,超滿足!!!

▲ 因為一開始啲小食店未開門,所以就好傻仔咁走咗好去食海鮮丼,3600円就有兩碗,有海膽有吞拿魚同三文魚籽,三樣鋪到滿滿,真係真係好吸引!

▲ 呢碗仲要係雜錦,件件魚生都好新鮮呢!不過食一碗就飽晒,其他食唔落了,真失策!

▲ 食飽飽,最後都要買串士多啤梨蘋消滯!原來白色士多啤梨清香好多㗎,淡淡嘅甜好特別。不過 800円一串又好似比較貴。

 

火災後 7店遭燒毁,其他如常營業

唔少人都關心,8月 3日場外市場火災燒到好勁好大煙,怕之後都無得再去。火災不但將樓高三層嘅建築物焚毀,燒毀面積更達 935 平方米,立食區嘅幾間老鋪被波及。好彩無人傷亡,而且大部份食肆都已經如常營業,所以大家準備出發嘅話可以放心啦!

 

圖片來源:http://www.tsukiji.or.jp(築地場外市場官網)
 ▲ 受影響地方主要係紅圈部份,所以築地市仍然係一個好值得嘅搵食地方啊!
築地市場

地址:日本東京中央區築地5−2−1

營業時間:05:00~15:00,週日與市場公休日公休。

 

更多東京之旅遊記!

【東京】築地場外市場搵美食!蛋香十足玉子燒 + 半塊面大生蠔

【東京】迪士尼海洋遊玩攻略 – 極速入手 Duffy 達菲熊精品 + 霸位睇米奇魔法師表演

【東京】去迪士尼做足準備!東京迪士尼樂園 8大遊玩攻略 – 避過香港同款遊樂設施,玩足全園無難度

【東京】純愛電影浪漫取景地 – 橫濱一日遊!自製合味道杯麵 x 山手西洋館享受異國情調

【東京】羽田機場離開前必須搞掂的 5 件事!實試日本 11日無限速 LTE SIM 卡 + 開通教學

【東京】櫻花係咩味?邊賞櫻邊食櫻花甜品 + 日本便利店必買限定品

【東京】櫻花季 6大必去賞櫻熱點!2017 滿開預測 x 交通攻略

 

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie



About 依莉詩

網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。