雖然最近都係寫玩樂嘢為主，但 gadgets 係生活中唔可以缺少嘅部份。襯住【香港秋季電子展】又開始，我 依莉詩 當然走去初創專區八吓嚟緊有咩新科技啦！
初創專區創意多
今年秋電展同組件及生產技術展有來自 25個國家及地區，約4,300家參展商參加，亦係全球最大電子產品商貿平台。主館同上年差唔多，主要都係機械人、無人操控技術、智能科技、虛擬現實 同 3D打印，所以要睇新創意就一定要去初創專區。今年唔單止有近 100間初創企業參與，會場仲會有初創企業介紹會、初創導航講座、「科創企業 ─ 提案．交流．配對」以及「科創企業傳媒演示日」等，一定可以係度搵到新靈感！
1) 4 合 1 健身組合提醒你每個正確姿勢
為咗慳錢慳時間，唔少人都會跟住 YouTube 喺屋企做健身，不過只係睇，跟本唔知啲姿勢啱唔啱。呢套 4合 1 的智能健身組合就好似個私人教練，手柄配合跳繩、健腹器 同 啞鈴等配件，再連接手機 App，就可以按照指示做各類型健身動作。手柄會偵察力度同姿勢，如果有錯會立即提醒，可以更有效 Keep Fit。
▲ 如果配合智能手錶一齊用，仲可以知道埋心跳等紀錄，更有效了解身體狀態㖭！
▲ 姿勢同力度會經手柄作偵察，可以確保每一下都有效。
▲ 輸入個人身高等資料，就可以跟住 App 嘅指示每日健身。$2200 有個私人教練，價錢都合理。
2) 翻譯神器旅行溝通無難度
之前都介紹過 Adam Elements 公司嘅 Smart Mirror 智能鏡，一塊鏡既係屏幕又係鏡，真係好似 iron man 咁，可以一邊刷牙，一邊播歌，睇新聞。今次仲有新功能，可以模擬化妝同自拍㖭！出門前就可以慳好多時間啦！而呢間公司另一樣新產品係翻譯神器，可以即時翻譯 20種語言，旅行時面對言語不通做啱晒！
▲ 負責人即場示範，翻譯速度都幾快。呢部翻譯神器下個月推出市場，大約$2000左右，如果自用好似有啲貴，可能商業用會比較化算。
Adam Elements Hong Kong Co., Ltd.
攤位編號：CH-M12
3) 20秒打印咖啡上的相片
最近興起將相片打印係咖啡同馬卡龍上面，而呢部 EVEBOT Fantasia 雖然只能印單色，不過可以透過 QR Code傳送圖案，大約 20秒就可打印出來，非常快，加上機身唔算大，適合小型 cafe shop。
▲ 印上奶泡上嘅相片十分清析，Keep 到一段時間都唔會化，有足夠時間打卡。
Shenzhen Eve-Innovations Technology Co., Ltd.
攤位編號：CH-G12
4) Google Glass 第二代玩視像會議
Google Glass 出咗咁耐都未普及，原來轉戰商業路線。呢間公司就嘗試結合 Google Glass 玩視像會議，同客戶對話，同時對方可以第一視覺見到你所見嘅影像。
▲ 呢個技術令我諗起日本好 hit 嘅網上旅伴，足不出戶，但就可以第一身視覺感受現場環境。
Spher8 Technologies Company Limited
攤位編號：CH-P09
5) 港版 Surfwheel 陸地滑浪
唔知仲記唔記得，《春嬌救志明》有一幕余文樂扶著歐鎧淳教她玩電動滑板，原來呢款電動滑板係由香港人設計同研發。Surfwheel 就好似滑浪同滑雪，用身體擺動控制速度同方向，充電 1.5 小時後可連續使用 1 小時，最高時速約 18 公里，仲可以連接 App 睇到速度同電量。
▲ 好耐之前玩過另一款單轆嘅電動滑板，玩到幾乎仆親，唔知呢款又係唔係一樣咁難操控呢？
Koofy Development Limited
攤位編號：CH-B05
6) 大腳板機械人學 Coding
小學生學 Coding 已經係平常事，呢個機械人可以入 Code 令佢做任何動作。因為佢腳板比較大，關節可動性同平衝力都超強，打關斗同耍功夫都得呢！
Leju (Shenzhen) Robotics Co., Ltd.
攤位編號：CH-H12
▲ 喺門口同 Model 合照仲可以經過 IG 即時印出嚟㖭！
第37屆香港秋季電子產品展覽
日期:2017年10月13至16日 (星期五至星期一)
地點:香港灣仔博覽道1號香港會議展覽中心(港灣道入口)
【延伸閱讀】
