缺少呢 3點,尿袋幾大都無用!依莉詩教你揀流動充電器

自從有智能手機之後,尿袋基本上係必需品,但就算日日帶出街,都唔會話特別講究,求其帶個贈品出街就算。但手機愈轉愈新款,啲贈品已夠滿足唔到部機,唔係充唔到電,就係充極都唔滿,最後都係要死死地氣買番個。今次就等我 依莉詩 分享下揀尿袋心得啦!

1)容量大亦要輕便

買尿袋最緊要睇容量,通常盒背都會寫著有幾多 mAh。不過唔好以為寫 10,000mAh 就真係有 10,000mAh 嘅電量。其實電池轉換到手機之間會有耗損,一般轉換率只有 7-8成,即係10,000mAh 容量嘅尿袋只會傳出到 7,000mAh左右。即係話 iPhone 7 Plus 嘅電池有 2,900 mAh,10,000mAh 嘅尿袋就可以充 2-3 次。

不過唔好以為 mAh 愈大就愈好,但 mAh 愈大嘅尿袋就會愈笨重,拎出街都會唔方便,加上 10,000mAh 以上嘅尿袋外型多數都好普通,唔會有卡通公仔,所以除非出足全日街,或者要充幾部電話,唔係嘅話 5,000mAh 都已經足夠不時之需。

 

▲ 一般包裝同尿袋背面都會印有電池容量。

2)快充亦要配合手機

講完容量就要講速度,用得尿袋都係想急救部手機,下下掉住都幾麻煩,所以充得快好世界!其實充得快定慢除了要睇輸出嘅電壓功率同 USB線速度之外,都要睇支唔支援快充技術。

最近唔少尿袋都支援 Quick Charge™  2.0 快充技術或 Quick Charge™  3.0 快充技術。不過,就算尿袋有快充都要睇埋你部手機支唔支援,唔係都係得物無所用。如果手機支援 QC 2.0,配合有  QC 2.0 嘅尿袋就可以比一般尿袋充電快 75%。但如果手機支援 QC 3.0 ,尿袋得 QC 2.0,充電速度都唔會特別快。因為我部手機唔支援快充,所以都係揀隻比較平嘅就好了。

 

▲ 雖然某啲牌子嘅尿袋支援快充,但不會是所有 USB 位都支援呢!如果出街要 share 俾朋友,就睇你比邊個位佢差電啦!

3)安全致上忌貪平

耐唔耐都有尿袋爆炸發生,輕則燒爛手袋,重則要車廂內嘅人同你一齊疏散,所以一個好嘅尿袋一定要有安全設計,就好似Magic-Pro ProMini R10 內置有 PTC 安全智慧晶片,提供過充、過流、過放及短路保護,確保電池任何時間嘅安全性。

就算係街買未必知佢有咩設計,都可以留意包裝上面有無歐盟 CE 和美國 FC 認證,有的話就代表尿袋係過熱、過充時會立刻斷電,防止尿袋被熱溶或爆炸。

▲ 此外,部分牌子都會為產品購買責任保險,例如 XPower、Infinity Pro、Sony 等,包裝上都有已購買保險嘅貼紙。雖然係貴過雜嘜尿袋好多,但有咩事上嚟都可以提出索償嘛!



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。