雖然我 依莉詩 同好多女仔一樣，得閒都有興趣整吓甜品，但屋企地方細，無一個設備齊備嘅廚房。就算有個細焗爐，火力又唔均勻，有個電動攪拌器，又唔夠力打太耐。最近發現旺角有間一站式烘焙店，只要揀好食譜，店內會提供材料同設備等你自由發揮，比起廚藝教室更加自由。由選料、落手，到包裝都一腳踢，真正係自己甜品自己整！
千呎空間 自取材料用具
呢個 BAKE YOUR OWN 一站式自助烘焙空間 喺家樂坊樓上，地點方便。1,200呎嘅地方相當闊落，分為 8個區域，有材料區、工具區、包裝區、冷藏區、攪拌區、焗爐區、加購區 同 清洗區。每區上面都有牌寫明分區，只要跟住電子食譜去搵材料同工具，就可以順利完成製作。
▲ 大家最關心嘅設備都算高級，攪拌區有 7部 Kitchenaid 攪拌器，不銹鋼坐枱式設計，可以運作 10幾分鐘都唔怕過熱，相信打麵糰都會夠力。
▲ 18部 Delonghi 焗爐，雖然焗爐未去到嵌入式咁好，但火力都算均勻，要做出家庭式甜品都無難度。
▲ 冷藏區有 3個大雪櫃，冷凍材料還是成品都分得清楚。
▲ 自助式烘焙空間當然同廚藝教室唔同，自己用過嘅用具都要自己清潔返，而且洗完要分返類，好似以前上家政堂咁。不過，唔想洗都可以畀 $30 清潔費要人幫你洗嘅。
自由度高不限時製作 20款電子食譜任揀
喺呢個自助式烘焙空間雖然價錢不算便宜，但勝在自由度高，只要入場前揀好想製作嘅甜品食譜，落單付款後，就可以開始製作，不會限時自由發揮。眼見大約有超過 20款食譜，價錢介乎 ＄150 至 $420，每個都寫明製作時間、價錢同製作難度。由曲奇、 朱古力、馬卡龍 到 芝士蛋糕 都有，應該可以滿足大部份人需求。如果想自攜食譜都可以，3小時收費$500，只需事前一日同店主溝通，佢哋會為你準備好材料同睇清楚製作步驟，萬一有咩唔識，職員都會指導你。
▲ 電子食譜十分詳盡，除了短片教學，仲有圖文說明，就連每項材料係邊區拎同幾時需要洗碗都寫得一清二楚。
▲ 只要跟著食譜到材料區準備相應份量嘅食材就可以開始製作。
▲ 每個人都會有自己嘅工作枱，準備好材料就可以拎返去開始製作。
▲ 焗爐嘅火力均勻，亦唔會太高溫，蛋糕沒有爆面情況。
▲ 砌好海綿蛋糕就要細心塗上忌廉同士多啤梨餡。
▲ 雖然沒有導師逐步指導，但當遇到困難時，職員都會提供協助。就算失敗，下次再挑戰都會有 9折優惠。
▲ 每一個蛋糕都送一個靚靚包裝盒，方便大家送禮或者將作品帶返屋企。
▲ 每款盒都有唔同大細，裝「女神BB」嘅盒 5個形，好特別呢！
▲ 如果想買其他裝飾，可以去加購區買，令蛋糕更加獨一無二。
2月份限定食譜 迎接情人節+農曆新年
呢個自助式烘焙空間每個月都有新款食譜推出，2月又係情人節又係新年，當然亦有特別款式。當中嘅「女神BB 」仲係大熱嘅水晶球蛋糕款式，除了可以放金莎外，仲可以額外買法式蛋白霜、永生花，又或者自己帶啲小擺設同相入去呢！最近仲有生日優惠，生日當日可以免費整蛋糕畀自己！如果正日唔得閒，前後三日都有半價優惠。生日優惠每日都有張額，記得提前預約呀！
▲ 女神BB $400
難度：中級
製作時間：2.5小時
▲十三么榛子朱古力 ＄328／14塊
難度：初級
製作時間：2小時
BAKE YOUR OWN 一站式自助烘焙空間
地點：旺角登打士街 56 號柏裕商業中心 1405
開放時間：星期一至日 10am-9pm
電話：3460 3475
網上預約: https://bakeyourown.simplybook.me
更多情侶放閃必技！
【情侶自拍攻略】學識呢幾招女朋友包滿意！自拍婚紗 10大 拍攝 + 後製 技巧大公開 (上集)
【情侶自拍攻略】學識呢幾招女朋友包滿意！自拍婚紗 10大 拍攝 + 後製 技巧大公開 (下集)
【情侶自拍攻略】 呃like必備！自拍放閃 10大 必備 Pose
【情侶自拍】影出不一樣的放閃相！香港兩大主題樂園影相位逐個捉 (上集)
睇更多拍拖好去處！
FB： 依莉詩生活
IG： 依莉詩美食地圖
網址：ErieDiary.hk
YouTube：Diary Erie
【延伸閱讀】
