超逼真!組隊做海盗尋寶 – 港人研發 VR 體感遊戲 玩足 30分鐘唔頭暈

通常玩 VR Game 都係一個人自私玩,投入咗個旁若無人嘅世界,但原來 VR Game 都可以組隊一齊玩!就好似最近 Sandbox VR 新推出《海魔的詛咒》遊戲,唔單止可以 2-6個人一齊玩,體感背心仲可以感受到被攻擊嘅滋味。咁刺激!依莉詩 就同阿仁、祖迪組隊去挑戰喇!

組隊做海盗尋寶,朋友互動更投入

顧名思義,《海魔的詛咒》就係一個海盜遊戲,2至6人一組化身 6個唔同角色,喺海盜船上面搵寶藏。因為係港人設計,NPC都係用廣東話帶領我哋過關,非常親切。遊戲入面嘅骷髏骨、海怪、鬼魂四方八面衝過嚟,有啲仲衝到好近好逼真。手上有搶可以擊退敵人,令氣氛更刺激,又唔會似鬼屋咁恐怖。加上有隊友一齊進攻,如果死咗都可以互相復活,就算細膽都可以放心享受過程!

▲ 因為遊戲都幾刺激,所以玩之前要睇清楚注意事項同簽署。

▲ 6個角色中,有男有女,有個仲似足張保仔!

▲ 被攻擊時,體感背心會震動,仲會第一身睇到自己受傷流血,真係會嚇一嚇!

▲ 如果畫面突然變成黑白,就代表自己死咗,需要隊友拍自己肩頭復活,所以全個 Game 講得最多就係「我死咗!」哈哈~

獨家體感裝置,玩 30分鐘唔怕暈

平時玩 VR Game 都唔玩得耐,玩 10幾分鐘就要抖抖,但呢個 Game 一場就成 30分鐘。起初都擔心玩咁耐會唔會唔舒服,好彩畫面都好流暢,同埋關過關之間唔需要大動作移動,所以玩完都無頭暈頭痛。我問過其中一個遊戲設計師 – Steven。原來重點在於 Haptic vest 體感背心前後共40顆的感應器,令到自己同隊友身體郁動都可以更準確紀錄出現係遊戲畫面,減低少錯覺產生,無咁易暈。

 

 

▲ 除咗背心,手腳戴上動態捕捉裝置,可以測量玩家身高同動作,呈現係遊戲入面。

▲ 《海魔的詛咒》遊戲唔單止由構思、技術同遊戲內容都係香港人自行研發,公司 Sandbox VR 仲喺美國,泰國同埋新加坡有分店㖭!原來香港都有好嘅科技同技術呢!

Sandbox VR
地址︰尖沙咀金馬倫道5號太興廣場4樓
收費:
每場 $180/人(星期一至五 11am-6pm);
每場 $280/人(星期一至五 7pm-11:15pm、星期六、日與公眾假期)
*不設Walk-in,必須網上預約。

 

更多一日遊路線!

長洲 1.5 日單車美食懶人包!食盡 7大小食 + 張保仔洞探險

港版小清境 – 塔門一日遊!食海膽炒飯 + 大草地放風箏

由黃大仙走到九龍城! 半日遊深度體驗香港傳統文化

情侶放閃必去!精選 10大假日輕鬆好去處 (上集)

情侶放閃必去!精選 10大假日輕鬆好去處 (下集)

 

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie


About 依莉詩

網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。