新年唔理幾爛都會入場睇賀歲片，但其實以前港產片都曾經風光一時，陪伴唔少香港人成長。最近我 依莉詩 就發現咗佐敦有個好地方，以經典舊香港電影場景做主題，舉辦咗一個港式懷舊3D畫展，唔單止有多件懷舊展品可以近距離任影唔嬲，仲免費入場，大家不妨去睇睇！
重現 60’s 電影業好時光
呢個 3D 館其實係木的地酒店嘅藝術廊，酒店雖然喺佐敦開咗 6年，但一路都無咩人察覺，直到上年10月將地下藝術館重新裝修成懷舊主題 3D館，就開始受到關注，變身成一個勁吸引嘅打卡位！走入展覽就如置身舊戲院一樣，由售票處、小食檔到電影經典場景都有，多幅 3D畫同出現嘅人物服飾都好逼真呢！
▲ 昔日入戲院前有唔少小食檔賣爆谷、魷魚、花生同蔗，啲畫畫得好似呢！
▲ 就連小販嘅衣著都係 60’s 嘅草帽同短褲。
▲ 售票處賣緊李小龍嘅飛，快啲買飛入場睇啦！
▲ 當中有《龍爭虎鬥》嘅場景，大家可以同李小龍決一死戰。
▲ 電影《我和春天有個約會》中嘅夜總會「麗花皇宮」亦代表住昔日香港嘅輝煌時光。
重溫獅子山下嘅日常生活
入到「戲院」，有好幾個唔同嘅舊香港場景，由公屋、地攤、飛髮鋪、夜總會，到街頭報紙檔都有。真實嘅道具加上 3D畫，重現一個個獅子山下嘅日常生活。特別係公屋場境中嘅碌架床同摺枱摺凳，真係非常真實！
▲ 講到舊式小店又點可以無理髮店，估唔到連飛髮椅同剪髮器都係真‧古董嚟！
▲ 另一邊廂嘅電話亭同電話都同以前嘅一模一樣㗎！
▲ 以為識字嘅人可以幫人寫信搵食，一字千金，可惜而家嘅寫手已經⋯⋯
與真·古董零距離接觸
平時 3D館只係影相打卡，呢度除咗影相，仲可以近距離接觸唔少真‧古董。多個唔同年代嘅打字機、收銀機、相機擺晒出嚟，好多我都未見過呢！
▲ 唔同年代嘅電話都有，雖然可以隨意拎起，但大家記得愛惜公物呀！
▲ 以前要用菲林相機先影到相，邊有而家咁方便。
▲ 另一邊廂有電影《歲月神偷》嘅佳記皮鞋店，旁邊仲有三架舊款兒童車，好得意㗎！
▲ 講到代步工具，有錢人就會坐車，呢架就係電影《色，戒》入面嘅同款古董車，仲要有真正嘅行車證㗎！
▲ 除咗古董車，人力車都係以前嘅代步工具，連雞毛掃都有，道具真係好齊全！
木的地酒店 3D懷舊館
地址： 香港九龍佐敦長樂街1號地下
時間：早上6時至11時
備注：訪客只需簡單登記即可免費參觀
更多一日遊路線！
長洲 1.5 日單車美食懶人包！食盡 7大小食 ＋ 張保仔洞探險
【延伸閱讀】
