情侶慢活行程!錦田一日遊 – 遊走漫活市集 + 壁畫村打卡 + 天空之鏡睇日落

放假搵節目,除咗大型商場,好似無乜邊到好去,但其實大西北嘅新界地方都仲有一啲城市化速度較慢嘅地方,可以感受下老舊嘅圍村風情!今次我 依莉詩 就帶大家去錦上路西鐵站附近嘅好去處,嚟過慢活嘅錦田一日遊!

第一站:韓風貨櫃商場歇一歇

講到西鐵,好多人都記得有屯門、元朗、荃灣西站,但偏偏就會忽略咗錦上路,主要係因為附近無大型商場,發展亦都較慢,不過亦因為咁,就有更多個性小店同濃厚嘅人情味!

第一站我哋就去咗設計新穎嘅貨櫃式商場 – 「盈匯坊」打卡。喺西鐵錦上路站 B出口出站,穿過跳蚤市場,再行上有蓋行人天橋,沿着單車路行大約 3分鐘就到。呢個貨櫃式商場就好似微型版嘅首爾 Common Ground ,一個個貨櫃同木系建築組成商店街,中間一條人工小河同花圃,加上附近無高樓大廈,好有置身郊外嘅感覺。雖然我哋去嗰日大部份店都無開門,不過都有餐廳同兒童遊樂中心畀大人小朋友歇一歇,而商場間唔中都會邀請本地音樂人進行表演,喺一個放鬆心情嘅好地方。

▲ 盈匯坊規模細小,不過貨櫃同木系建築組成嘅商店街好有特色,不妨影下相。

盈滙坊.新進駐貨櫃商店街

地址:錦上路站B出口
開放時間:上午9時 – 晚上9時30分 (大部份店鋪周末營業)

第二站:錦田紅磚屋享受歐洲慢活下午

離開盈匯坊,直行過馬路就到第二站 -「錦田紅磚屋」。紅磚屋前身係洋蠋工廠,用紅磚砌成,外型有少少似橫濱嘅紅磚倉庫,而內裡就係週末市集,售賣各式復古傢私、擺設、收藏品、飾物等等,充滿復古歐洲風。雖然只有吊扇,無冷氣,夏天去會有啲熱,不過坐喺復古傢私歎美食,陣陣自然風吹送,尤如置身歐洲嘅街頭,非常寫意。

▲ 紅磚屋內每間小店都各有特色,呢碟咖喱羊腩配豬仔包看似普通碟頭飯,不過就好有人情味,店員走過嚟同我哋吹咗好耐水。我哋提佢未收錢,佢都好似唔急咁,仲係度同我哋講吹自然風,享受大自然有幾好𠻹!

當然呢碟咖喱羊腩亦整得好用心,每舊到炆得好腍又唔膻,配埋脆卜卜嘅豬仔包就更有口感。如果食得辣嘅朋友仲可以加埋佢哋嘅秘製辣醬,提升咖喱嘅惹味𠻹!

▲ 唔食羊嘅朋友可以揀牛腩咖喱配飯,牛腩一樣炆得好腍又無筋,咖喱惹味得嚟又唔辣,撈埋飯食就夠滋味!

▲ 店員話佢夏天會挑走晒啲脂肪等客人食落無咁膩,但冬天會刻意留返少少,食完個身暖啲,真係好細心!

▲ 另一間小店賣街頭小食,呢個潮式炸豆腐就炸得外表香脆內裡軟滑。

▲ 韮菜餃粒粒飽滿,雖然係煎,但入面仲鎖住好多肉汁。

▲ 相比之下炒麵就較為普通,就係一個普通炒麵。

▲ 食飽係時候行下街,紅磚屋嘅小店唔少都收藏咗店主嘅寶物,好似呢間就有好多世界各地嘅迪士尼樂園襟章同麥當勞襟章,而且價錢都唔算貴,大家不妨嚟搵下有冇自己嘅心頭好!

▲ 除咗收藏品,亦有唔少本地嘅農產品賣。呢位自稱「蜂王張」嘅伯伯就賣自家製嘅蜂蜜,試完之後我都忍唔住入手呢!

▲ 喺紅磚屋行街就好似尋寶咁,每一間賣嘅嘢都唔同,而且店主們都好熱情,完全無喺大商場期望你消費嘅壓力。

▲ 部份小店仲提供工作坊畀大家參加𠻹!

錦田紅磚屋

地址:新界元朗錦田祠堂村地段 390至 400
開放時間:上午10時 – 晚上6時 (只在星期五、六、日和公眾假期開放)
電話: 2482 2188
官網: www.YL.hk/rbh

第三站:錦田壁晝村打卡

離開紅磚屋,下一站就係「錦田壁畫村」。錦田壁畫村其實係一個由視覺科郭燕銘老師發起嘅社區活化計劃。沿着錦田紅磚屋右邊小路走向錦田市中心同吉慶圍附近一帶都可以搵到唔少由義工繪畫嘅壁畫。每幅壁畫都各有風格,遍佈喺店舖、住宅外同馬路邊,令社區添加唔少活力!大家記得打卡之餘要注意聲浪,記得帶走自己嘅垃圾,做個好遊人呀!

▲ 沿着錦田紅磚屋右邊小路走,就開始尋壁畫之旅!

▲ 第一幅就見到唔同嘅貓貓係牆上,顏色好繽紛。

▲ 店鋪鐵閘都係一張大畫布。

▲ 自2017年10月動工開始,經過一班義工嘅幫助下,已經有逾 30幅作品面世,而且佢哋會不時翻新畫作,好似呢幅就同之前唔同咗主題啦!

▲ 提提大家,有三幅壁畫喺啲隱藏嘅小巷,要搵晒佢地,除咗要有觀察力,仲要好有恆心呢!

▲ 部份壁畫喺馬路邊,打卡嘅時候要小心安全呀!

▲ 就連店鋪門口都唔放過,不過記得影嘅時候唔好騷擾到居民。

▲ 每一幅壁畫嘅風格同主題都唔同,呢幅嘅線條就無咁明確,營造成宇宙嘅效果。

錦田壁畫村

地址:新界元朗錦田吉慶圍(錦田公路側)
網址:https://www.facebook.com/pg/kamtinmural/posts/?ref=page_internal(內附每幅壁畫嘅位置)

第四站:港版天空之鏡睇日落

玩咗咁耐,太陽差唔多落山,我哋就搭車去水尾村嘅池塘睇日落!據閒呢度有「港版天空之鏡」嘅美譽,太陽倒影喺池塘,一片金黃色,不難想像以前有幾靚,不過可惜對面新起咗 YOHO 嘅物業,再加上池塘邊嘅爛地車場,有點兒大煞風景!

▲ 日落嘅時候太陽剛好被高樓遮住,真係有啲可惜!

▲ 而池塘旁邊有間「錦田樹屋」,之所以叫樹屋並唔係因為有間屋係樹上面,細心啲睇,原來係因為有棵老榕樹圍住間石屋生長,十分詭異!

錦田水尾村

第五站:情侶浪漫晚餐

睇完日落,就喺時候食晚餐醫肚。由水尾村搭 601 小巴到爾巒站就會到旁邊嘅天空之城。呢度有好幾間特色餐廳畀你慢慢揀,而我哋就食咗一間叫 Boss Kitchen 嘅西餐廳。餐廳分咗 3區,有悠閒嘅露天花園區,浪漫嘅室內區同毛小孩冷氣區。無論閨蜜閒聚定情侶晚餐都一樣啱feel,狗主仲可以帶狗狗一齊歎冷氣𠻹!

▲ 呢塊 16安士帶骨肉眼超巨型!真係大過塊面!7成熟左右,肉質嫩滑、完全唔乾身,仲帶點肉汁,好Jiucy 同入味,唔使點芥末都已經好正!

▲ 芝士忌廉蟹肉釀比特菇一樣好大個,芝士忌廉唔膩,而且蟹肉釀得好滿好豐富,啖啖都好滿足!

▲ 西班牙辣肉腸白汁煮大蜆無沙之餘,每隻都好彈牙,有鮮味!連埋辣肉腸一齊食又有另一種味道。

▲ 香煎大蝦龍蝦汁海鮮意大利飯好有鮮味,濃度適中,唔會太膩。大蝦大隻得嚟無雪味,反而好彈牙入味。

▲ 酥皮蘋果批酥皮同蘋果片輕薄鬆脆,配埋雪糕就更清新,令整餐非常完滿!

老總廚房 Boss Kitchen

地址:元朗錦田高埔村108號天空之城第6座地下

更多詳情:元朗隱世悠閒餐廳!高質牛扒、蘋果批 + 毛孩冷氣房搞狗主聚會

 

更多一日遊路線!
屯門後花園偽日本打卡路線!藍地水塘+龍門居夜市|周末好去處|一日拍拖行程

鴨脷洲漁村風情半日遊!食盡老香港情懷 – 船河、大排檔、糕點小食

長洲休閒一天遊 – 賞櫻、行小店、睇日落

長洲 1.5 日單車美食懶人包!食盡 7大小食 + 張保仔洞探險

港版小清境 – 塔門一日遊!食海膽炒飯 + 大草地放風箏

由黃大仙走到九龍城! 半日遊深度體驗香港傳統文化

情侶放閃必去!精選 10大假日輕鬆好去處 (上集)

情侶放閃必去!精選 10大假日輕鬆好去處 (下集)

 

————————————————————————————–

盈豐銀行

————————————————————————————–

 

睇更多拍拖好去處!
FB page: 依莉詩生活
美食 IG: ErieDiary
打卡 IG:ErieDiaryhk
網址:ErieDiary.hk
YouTube:ErieDiary


About 依莉詩

網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。