【東京】去迪士尼做足準備!東京迪士尼樂園 8大遊玩攻略 – 避過香港同款遊樂設施,玩足全園無難度

香港迪士尼樂園去得多,幾乎合埋眼都識行。難得有機會去到日本,梗係要去東京迪士尼走一轉啦!果然東京迪士尼樂園比香港大得多,仲分開「陸地」同「海洋」,兩日都未必玩唔晒。不過,其實「陸地」部分唔少遊樂設施都熟口熟面,就好似飛越太空山、巴斯光年、小小世界 同 小熊維尼 都一樣有,要把握時間玩到盡,梗係避過香港都有嘅同款遊樂設施啦!正所謂去迪士尼做足準備,就等我 依莉詩 同大家講下出發前有咩要注意啦!

必知 1:選好日子避過人潮

去主題公園最怕就係人多,明明一日可以玩十幾個機動遊戲,但就可能因為要排隊,最後玩得一兩個,掃興之餘又咩都玩唔到。唔想做沙甸魚,可以係揀日子之前上「入園人數預估」網站,睇下邊日係好日啊!網站唔單止會預計當日天氣,仲會估計埋當日多唔多人。都幾準㗎!因為係櫻花季,無可避免人多,只好揀深紅色日去,所以都要排幾耐排下呢!

除咗人潮,多唔多時間玩都要先睇當日「開園時間」。事關樂園日日開園到閉園時間唔同,冬天同夏天最誇張可以差成 3個鐘,所以一定要上網睇清楚先揀日子!揀得啱先可以俾同樣嘅價錢,有更好嘅享受!

 

圖片來源:http://www15.plala.or.jp/gcap/disney/

▲ 樂園會跟據以住入場人次同埋學校假期、天氣等等因素,去估計入場人數。唔想做沙甸魚就一定要揀個好日子啦!

圖片來源:http://info.tokyodisneyresort.jp/tc/calendar/201705.html#20170515

▲唔同日子開園同閉園時間都可以好唔同,想玩多幾個鐘就要揀開耐啲嘅日子啦!

必知 2:買定飛免排隊

揀好日子就要諗下點買飛,一般嚟講分為 1)上 東京迪士尼官網 購買、2) 到旅行社代購、3) 到東京各地嘅 Disney Store 購買,又或者 4) 現場先買。4個方法各有各好處。

官網買都算方便,全英文頁面唔會買錯,而且可指定日期, 保證入園,不過飛唔多,太遲買可能會無晒。而旅行社買最簡單,可以保證入園,不過就比官網更貴一點,而且會用 A4 電子飛入場,所以就無得拎張靚靚門票留念。而到東京搵 Disney Store 先買就啱三心兩意嘅人,最後先決定去唔去,不過如果擔心到時搵唔到都係喺香港買定先吧!到最最最後就係即場買,呢個我最唔建議,因為要排超長龍,無謂一開始就浪費時間吧!

 

圖片來源:http://www.tokyodisneyresort.jp/tc/ticket/

▲ 去得梗係分兩日一次過玩齊「陸地」同「海洋」兩個區,所以買兩日飛就最實際。

必知 3:搭迪士尼單軌列車出發

講到點去迪士尼,住邊度嘅酒店好重要,唔少人都覺得,既然玩兩日,梗係住埋園區內酒店最方便。園區兩條免費巴士路線,一條連接迪士尼三間酒店,另一條連接海濱站嘅六間公認友好酒店。

不過唔想轉酒店,其實市區去迪士尼都幾方便,JR新宿車站新南口嘅 JR高速巴士總站就有巴士直達迪士尼樂園,50分鐘車程,可以係車眠一眠。如果好似我咁係東京出發,都可以搭 JR京葉線或者JR武藏野線到舞濱站,都係 30分鐘左右,仲快過由旺角去欣澳。

圖片來源:http://www.tokyodisneyresort.jp/tc/guide/

▲ 其實去迪士尼都算方便,未必一定住園內酒店都可以玩兩日。

圖片來源:http://www.tokyodisneyresort.jp/tc/access/drl/index.html

▲ 同香港迪士尼一樣,東京迪士尼都有專線前往,車上玻璃一樣係米奇圖案,不過呢條迪士尼線就有 4個站,循環咁經過度假區、迪士尼樂園、海濱 同 迪士尼海洋。

必知 4:規劃 7 大園區路線

開頭都講過,「陸地」部分唔少遊樂設施都熟口熟面。東京迪士尼樂園 7大園區,佈局基本上同香港差唔多,一入都去都係兩排維多利亞式建築,售賣以餐廳、紀念品商店和服務設施為主。當然呢個世界市集比起小鎮大街長好多,闊好多啦!遠望嘅亦都係公主城堡,左面係明日樂園、卡通城,中間係夢幻樂園,右邊係動物天地、西部樂園、探險樂園。雖然釋名唔同,但當中 4個園區就係香港都有,所以就算第一次嚟,都可以唔洗睇地圖四圍行。

而園區入面嘅遊樂設施亦有唔少重覆,就好似飛越太空山、巴斯光年、小小世界 同 小熊維尼 都一樣有,要把握時間玩到盡,梗係避過香港都有嘅同款遊樂設施啦!

圖片來源:http://www.tokyodisneyresort.jp/

▲ 東京迪士尼同香港嘅佈局差唔多,當中 4個園區香港都有,所以就算第一次嚟,都可以唔洗睇地圖四圍行。

▲ 如果由明日樂園玩去,必玩嘅一定係《星際旅行:冒險續行》。雖然同 Iron Man 差唔多,都係坐上飛船,戴上 3D 眼鏡,睇 4D影院,不過主題改成星球大戰,好有臨場感。

▲ 另一個明日樂園必玩就係《怪獸電力公司》「迷藏巡遊車」,坐係車上面用電筒照田雞⋯⋯唔係⋯⋯係怪獸,好得意!

▲ 幽靈公館有少少似迷離莊園,不過就更有鬼屋 feel ,坐係車上面,由神秘大宅慢慢走入墓地,靈異但唔可怕。

▲ 至於講到少女夢想,當然係喺夢幻樂園。估唔到城堡內原來係仙履奇緣童話大廳,入面有好多畫同立體作品細說灰姑娘嘅故仔,仲可以試著玻璃鞋添!

必知 5:8項遊樂設施抽 Fast Pass

想把握時間玩更多遊戲梗係要學識抽快速通行 (Fast Pass),特別係人多嘅日子,熱門遊戲可能要排 3-4 小時。如果先抽 Fast Pass 到指定時間再去就可以加快排隊時間。

東京迪士尼樂園有 8項遊樂設施可以抽 Fast Pass,當中一半係明日樂園,分別有《星際旅行:冒險續航》、《太空山》、《巴斯光年》星際歷險 同 《怪獸電力公司》「迷藏巡遊車」,其餘就有幽靈公館、小熊維尼獵蜜記、飛濺山 同 巨雷山。所以如果要 Fast Pass 的話,最好一開始就衝去明日樂園,之後先去其他園區。

不過要抽到要先符合兩個條件,一就係一早入場鎖定目標跑跑跑,二就係有無限腳骨力,甘願走回頭路。事關大家都一早去抽 Fast Pass 好快就會派晒,而且抽到各設施嘅時間未必順路,因為我去嗰日人未算多得太誇張,最多都係等兩個鐘,所以都係寧願等下。

圖片來源:http://www.tokyodisneyresort.jp/

▲ 同香港抽  Fast Pass 唔同,呢度要將門票上面 QR-code 掃一掃抽票機先可以抽,所以千奇唔一入場就掉咗張飛。

必知 6:選定主題小食及爆谷桶

無論去大阪環球影城定東京迪士尼,爆谷筒都係人氣產品,幾乎園內每個人都有自己嘅爆谷桶。但因為唔同造型爆谷桶係園內唔同地方買,而且價錢都唔同,所以睇中都要搵下邊度買。因為我鍾意嘅 Duffy 爆谷桶係迪士聽海洋先有得賣,所以在此借其他人嘅爆谷桶攻略分享俾大家。

另外,東京迪士尼亦有好多造型可愛又有心思嘅小食,好似三眼仔麻糬、醜丫頭饅頭、Duffy 餅、唐老鴨水泡都係打卡必食之選!記得去官網搵定係邊度,留定肚食啊!

▲ 三眼仔麻糬係明日樂園嘅汎銀河披薩港,三粒都唔同味,朱古力、士多啤梨同奶黃餡,唔止樣得意,仲幾好食㗎!

▲ 係西部樂園會搵到吉拿棒,外表長長,原來橫切面係米奇嚟㗎!好似西班牙油炸鬼,少少肉桂味,好脆好好食呢!

必知 7:下載電子版地圖及表演時間表

講咗咁多,雖然話佈局同香港迪士尼相似,但出發前最好上網下載定樂園地圖,又或者入園時,同驗票口嘅服務人員拎定地圖,中文版同日文版都有㗎!仲要拎埋當天所有巡遊、表演的時間表,因為每日都會有兩場巡遊同夜間表演,雖然同香港嗰啲差唔多,不過都唔可以錯過啊!

 

▲日間同夜間都有花車巡遊,無香港迪士尼咁多藝員,但觀眾氣氛熱鬧好多呢!表演時間偏長,所以唔少人都會帶野餐墊坐係地上欣賞表演。

必知 8:下載迪士尼 App 睇等待時間及抽表演飛

除咗地圖,仲有幾個 App 未需下載定,就係睇排隊時間同抽表演飛嘅 App,兩個都超實用。但講到睇表演,我建議大家到太陽落山先睇,一來夜晚少啲人睇,二來迪士尼近海邊,夜晚比較凍,都係留係室內比較好。我哋晏晝去玩機動遊戲,夜晚就一次過睇表演,因為唔洗排隊,一口氣就睇咗提基神殿:史迪奇呈獻「Aloha E Komo Mai!」、鄉村頑熊劇場等幾個表演了!

 

圖片來源:https://play.google.com/store/apps/details?id=jp.plex.android.waittimetdr

▲ 用呢個 App 可以即時睇到各遊樂設施的排隊時間,下載:《Android》《Apple Store》。

圖片來源:https://play.google.com/store/apps/details?id=jp.tokyodisneyresort.lotshow

▲ 用呢個 App 就可以即時抽表演嘅飛,同 Fast Pass 一樣慳唔少排隊時間,下載:《Android》《Apple Store》。

 

【東京】羽田機場離開前必須搞掂的 5 件事!實試日本 11日無限速 LTE SIM 卡 + 開通教學

【東京】純愛電影浪漫取景地 – 橫濱一日遊!自製合味道杯麵 x 山手西洋館享受異國情調

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。