【東京】迪士尼海洋遊玩攻略 – 極速入手 Duffy 達菲熊精品 + 霸位睇米奇魔法師表演

之前一路都掛住寫暑假有咩玩，3月嘅東京之旅遊記寫到一半就停咗，其實仲有好多精采行程想同大家繼續分享呢！上回講到，我依莉詩去咗東京迪士尼樂園玩兩日，第一日去完「陸地」部份，今次就分享下「海洋」部份吧！

▲ 「陸地」部份同香港迪士尼樂園好似，所以就算唔跟地圖都會識行，但如果係第一次迪士尼海洋的話，最好都係先下載地圖，再決定由左定右開始行吧！

必買：可愛 Duffy 熊

雖然香港園都有 Duffy 精品賣， Duffy 新朋友 Stella Lou 已經登陸香港迪士尼樂園，不過呢度嘅 Duffy 精品都比香港平兩三成，所以去到又點可以唔搶購呢？Duffy 迷記得一入園就向左面開始行，先到美國海濱掃番個靚靚爆谷筒同手袋仔，咁就可以孭足全日了！

▲ 入到園第一架精品車就有 Duffy 同 Shellie May 嘅袋仔啦！雖然我一開始對 Duffy 無太大興趣，但喺迪士尼見到有人孭住之後，就突然愛上了！而且只係 ¥1700 ，於是即刻買了！

▲入到迪士尼幾乎人人都孭住個爆谷筒，當中最人氣爆燈嘅梗係 Duffy 爆谷筒啦！

圖片來源：http://www.tokyodisneyresort.jp/special/duffy/menu/sweets_drink.html

▲ 美國海濱有兩架爆谷車有得賣，一架賣白巧克力口味，另一架賣牛奶巧克力口味，但呢個爆谷筒差唔多係全場最貴，一個就要 ¥2500 ，仲要每人限買 3個。可想而之有幾搶手！

▲ 東京迪士尼嘅小食特別得意，三眼仔同醜丫頭饅頭已經夠可愛，呢對 Duffy 餅 (¥430) 見到更加想一啖咬落去呢！

▲ 如果嫌爆谷筒太大個，放入喼太佔位，可以買糖果盒 (¥920/個) 呢！細細個而且有齊 Duffy 同 3個朋友，儲齊一套或者買多幾個做手信都唔過份。

圖片來源：http://www.tokyodisneyresort.jp/restaurant/detail/str_id:CCC/

▲ 想買 Duffy 小食同糖果盒可以去美國海濱嘅鱈魚岬甜品店，隔離仲有餐廳賣 Duffy 主題美食，不過就排好長龍，所以就放棄了。

▲ 大隻嘅 Duffy 可能一隻就夠，買嘅套衫仔同佢日日換裝，而迷你版 (¥1500 – ¥1900) 就有唔同款式，隻隻都咁可愛，唔少人一掃掃幾隻呢！

▲ 而我最鍾意就係呢個 Shellie May 嘅手袋 (¥3900)，孭係背脊超可愛呢！可惜咁誇張嘅袋只能夠喺日本孭，喺香港孭出街一定會有好多人笑呢！

圖片來源：http://www.tokyodisneyresort.jp/shop/detail/str_id:aw_mcducks

▲ 園內有 3間店賣 Duffy 精品，當中以美國海濱嘅漁村迎賓小屋最齊，而且無時無刻都人頭湧湧呢！

必玩：神祕島刺激機動遊戲

買完一輪 Duffy 就係玩機動遊戲時間。雖然迪士尼海洋都有「美人魚礁湖」呢類專俾小朋友玩嘅區域，不過機動遊戲普遍都比迪士尼樂園刺激得多。細膽嘅唔好見人排就排隊，萬一去咗「地心探險之旅」咁刺激嘅過山車，又或者「驚魂古塔」咁恐怖嘅跳樓機就唔好啦！排隊之前去官網睇清楚遊戲簡介同等級，再揀啱自己程度嘅玩吧！

▲ 迪士尼海洋普遍遊樂設施都排幾長龍下，所以都係拎定 FP 比較好，而全園有 8個設施有得拎 FP，包括刺激嘅「驚魂古塔」、「地心探險之旅」；中級嘅「印第安納瓊斯冒險旅程」、「忿怒雙神」；合家歡嘅「玩具總動員瘋狂遊戲屋」、「海底兩萬哩」；同埋兩個必睇劇場「美人魚礁湖劇場」、「神燈劇場」。

▲ 呢個係美國海濱嘅「驚魂古塔」睇落以為係普通解築物，但傳說呢間豪華飯店嘅主人失蹤之後，每次有人乘搭電梯前往飯店頂樓時，都會有奇怪現象，變成恐怖嘅跳樓機。

▲ 神秘島入面嘅「地心探險之旅」同樣係驚險遊戲之一，高速嘅過山車穿梭地底世界，比起灰熊過山車刺激幾倍呢！

▲ 小朋友都係玩番啲小朋友遊戲好，呢個「辛巴達傳奇之旅」坐係船上面睇水手辛巴達同小悅虎揚帆出海嘅故事，感覺有啲似小小世界，輕鬆好多呢！

▲ 因為 FP 每日都有限定數量，所以都係愈早抽愈好。但通常抽完要兩個鐘之後先有得玩，呢個時候最好係附近玩另一個遊戲設施或者食下嘢先，唔太建議立即去另一個區抽 FP ，因為迪士尼海洋都幾大，如果一次過去晒全園抽 FP，恐怕已經無咁多腳骨力行番轉頭玩。

必影：阿拉伯海岸街角

相比起「陸地」部份，迪士尼海洋比較空曠，遊戲設施之間都有好多不同怖置嘅街角，當中阿拉會海岸、美國海濱同發現港都好有特色。特別係發現港入面就好似去咗威尼斯一樣，好有渡假氣氛，所以就算唔玩遊戲設施，帶腳架入去四圍影相，搭下船都係唔錯嘅選擇。

▲ 入到園第一樣見到嘅並唔係公主城堡，而係一個巨型地球，真係以為自己去咗環球影城呢！

▲ 阿拉伯海岸有超多影相位，眼見到有唔少日本學生妹係度自拍呢！

▲ 細心啲搵下，會發現唔少無人嘅街角可以影相。

▲ 美國海濱仲有好多仿古董車添，影出嚟效果嘛嘛，不個都幾得意。

必睇：米奇魔法師表演

前一日去迪士尼樂園最尾無煙花睇有啲失望，好彩呢度唔單止最尾有「幸福滿夜空」煙花睇，每夜「地中海港灣」仲有「Fantasmic!」表演，一開始由米奇魔法師學徒帶領，變出巨大水幕、雷射燈光以及水花、火焰等，之後仲有《阿拉丁》、《仙履奇緣》等主角來個花車巡遊。呢場約 20 分鐘嘅表演真係超有氣派，場面震撼，一定唔可以錯過！