櫻花甜定鹹？配咩最好食？呢個賞櫻之旅單單係睇櫻花又點可以滿足到我，梗係要食埋落肚先夠啦！係呢個櫻花季節，雖然櫻花小食無我想像中通街都係，不過唔少便利店產品都一改包裝華麗登場。到底夢幻粉色反後有係咪好食？等我依莉詩試完話你知啦～

 

邊賞櫻邊食櫻花甜品

上次就同大家介紹過邊到賞櫻最好，其實某些賞櫻地點附近都有小食檔又或者祭典，想食住櫻花賞櫻完全無難度！不過，要注意，日本人好少會邊食邊行，通常買完都會安排你入店內或店外長凳食，所以最好都係完先行。

1) 櫻花雪糕

話說小編到淺草寺果日又凍又大雨，但眼見一間甜品店出面大大張海報印有櫻花雪糕，即時被吸引咗埋去。粉紅色嘅外表加上花花雪糕筒，真係好靚好吸引。至於食落係咩味？其實除咗凍同少少清甜，食唔到咩味，不過雪糕都幾滑，買嚟打個卡都抵吧！

 

購買地點：淺草寺旁雪糕店

售價：400 yen

▲ 天氣太凍，根本食唔到有咩味呢！哈哈

2) 櫻花紅豆雕魚燒

之前見過伊豆有鋪粉紅色櫻花雕魚燒好特別，可惜今次旅程無去到近郊。不過都比我係秋葉原搵到櫻花餡雕魚燒。雖然無粉紅色外表，但入面都係粉紅色櫻花紅豆餡，仲有啲綠色櫻花葉，食落都幾香鹽漬櫻花味，少少鹹加上好滑嘅紅豆溶，好好食呢！

 

購買地點：秋葉原 SEGA 地下

售價：300 yen

▲ 入面有粉紅色櫻花紅豆餡，仲有啲綠色櫻花葉添！

▲ 除咗限定嘅紅色櫻花紅豆餡，仲有好多唔同味，有機會可以試下。

3) 櫻花炭燒團子

櫻花盛開嘅時候，好多賞櫻地都有祭典，當然亦有好多美食啦！面對燒肉串、燒粟米、烤肉……嘅誘惑，我竟然揀咗呢串櫻花炭燒團子。睇個樣係幾可愛，仲要即燒，熱辣辣，但……咁細食嘅我，面對三舊無餡嘅團子，一食就填飽咗個肚。

 

購買地點：上野恩賜公園不忍池旁邊祭典

售價：300 yen

▲ 團子都係即叫即燒，熱辣辣，煙煙韌韌，有少少花香，不過就好鬼飽肚！

日本便利店必買限定品

除咗街頭小食，便利店嘅小食飲品都係去日本必試！櫻花季仲要唔少產品都一改包裝，以粉色華麗登場，真係無唔買嘅理由。

1) 鬆弛熊和菓子

呢兩粒咁 Kawaii 嘅鬆弛熊和菓子唔單止上面有櫻花圖案，入面仲係櫻花餡。雖然都幾甜，不過食落淡淡清香。只係睇個樣都被萌到啦！

購買地點：Lawson 便利店

售價：325 yen

2) Starbucks 櫻花抹茶

每年 Starbucks 櫻花杯都係重點，可惜今次去 Starbucks 已經被搶購一空，唯有買杯 Starbucks 特別版嘅櫻花抹茶 Latte 飲下。抹茶 Latte 多咗陣鹽漬味，未必人人鍾意，不過飲飲下就會愛上．

購買地點：Lawson 便利店

售價：230 yen

3) 伊藤園綠茶櫻滿開版

除咗有櫻花味，唔少飲品都改咗包裝，但入面都係一樣嘅。就好似伊藤園綠茶櫻滿開版，反正去旅行都要買嘢飲，買特別版留番個樽都好。

購買地點：Lawson 便利店

售價：140 yen

4) Asahi 春季限定版

上年香港興過一排櫻花酒，據說唔多好飲。而呢罐 Asahi 春季限定包裝係便利店就有好多人買。不過好唔好飲呢～以唔飲慣啤酒嘅小編就覺得好重啤酒味，都係果酒啱我啲。

購買地點：Lawson 便利店

售價：220 yen

5)  Ariel’s Wish日本櫻花季限定 Sakura Latte

最後介紹就係　Ariel’s Wish 日本櫻花季限定 Sakura Latte ，沖水後粉嫩嘅顏色好唯美，但味道偏甜，有少少似士多啤梨奶 (唔知係咪顏色似嘅錯覺呢？)

購買地點：成城石井 超級市場

售價：360 yen

 

更多東京之旅遊記！

【東京】築地場外市場搵美食！蛋香十足玉子燒 + 半塊面大生蠔

【東京】迪士尼海洋遊玩攻略 – 極速入手 Duffy 達菲熊精品 + 霸位睇米奇魔法師表演

【東京】去迪士尼做足準備！東京迪士尼樂園 8大遊玩攻略 – 避過香港同款遊樂設施，玩足全園無難度

【東京】純愛電影浪漫取景地 – 橫濱一日遊！自製合味道杯麵 x 山手西洋館享受異國情調

【東京】羽田機場離開前必須搞掂的 5 件事！實試日本 11日無限速 LTE SIM 卡 + 開通教學

【東京】櫻花係咩味？邊賞櫻邊食櫻花甜品 + 日本便利店必買限定品

【東京】櫻花季 6大必去賞櫻熱點！2017 滿開預測 x 交通攻略

 

睇更多拍拖好去處！
FB： 依莉“詩”生活
IG： ErieDiary
網址：ErieDiary.hk
YouTube：Diary Erie