夏天最好就係玩水！但今年中環無乜大型嘉年華，我 依莉詩 決定轉戰白石燒烤水上樂園繼續玩！不過我呢個充氣樂園剋星，繼上年係「One Piece嘉年華」被巨棒擊中，再到「Slide The City」跣低之後，今次又再次實試「白石燒烤水上樂園」嘅急救措施足唔足夠了！
唔洗排隊！6條離心滑梯隨時瀡
其實呢個白石充氣水上樂園已經係第二年舉辦，入面有 6條充氣滑梯同 4個水池，規模都算大，比起海洋公園夏水禮多好多嘢玩呢！滑梯有長有短，大人細路可以因應自己膽量挑戰，最高嗰條 8.5米滑梯，好有離心力，相當刺激㗎！雖然當日時晴時雨，但望住吞露港，喺七彩繽紛嘅充氣設施下玩水，亦非常有氣氛呢！亦因為分開節數，每一節名額只限 200人，所以大部份設施都唔洗排隊，想瀡幾多次就幾多次，一定盡興。 每節最後都有水戰大戰，大家互擲水彈，氣氛升都最高點呢！
▲ 呢睇呢個彈床平平無奇，其實可以彈又可以滑，好多玩法㗎！
▲ 唔同 Level 嘅滑梯都有，無論大膽家細膽都啱玩！
每節換水，落雨仍繼續
玩樂設施就好足夠，但水上樂園睇水質同樣重要，因為每節人數唔多，而且每節都會徹底更換池水，所以入到去都好乾淨。不過因為係露天，落雨嘅時候仍可以繼續玩，水質自然亦變差。
起初我都擔心佢無更衣室，要係 BBQ場廁所換衫會好污髒，好彩入到去都算乾淨，最起碼無臭味同地下係乾嘅，而且物品寄儲係免費，可以多次拎出拎入，呢點好多水上樂園都未必做到呢！
▲ 樂園唔俾著拖鞋入去，而且會不停加新水，所以水質都 OK 㗎！
玩完 BBQ， 10人去先最抵
玩完兩個鐘都肚餓，隔離就係 BBQ 場，唔洗講梗係立即醫肚啦！呢個 BBQ 場我第一次去，平時都去屯門嘅場多。呢度有瓦遮頭，唔算多蚊，亦有風扇通風，唔會太熱，燒幾個鐘都感覺良好。不過唔係任食，所以都比較貴。如果多人去會比較著數，當中有 5人餐同 10人餐，奏夠腳去就最好。
▲ 今次我哋同阿仁同小小豬兩家人一齊去，啱啱好 10個人，叫咗個 $1397（星期一至五）、$1573（星期六至日）嘅 10人海鮮餐。除咗腸仔、丸、豬扒、雞翼，仲有青口、海蝦同帶子。份量好夠，最後仲帶咗幾包豬扒走添！
▲ 有埋個網就可以攤晒係度燒，好懶呢！
▲ 一開始個個都係燒丸同腸仔，哈哈～
親身體驗！安全措施不足，父母們務必注意！
好啦！講咗咁多好嘅一面，又係時候講番啲不太開心嘅經歷。無錯，整體呢個水上樂園係幾好，(初初) 玩得幾開心，但不幸嘅事情就係得意嘅時候發生啦！ 我哋本來打算一齊瀡一條可以同時多人瀡嘅 5米高滑梯，點知有隻淆底獸瀡慢一步，我落咗去佢先落嚟，仲一腳踢中我個頭，搞到我一度聽唔到嘢，耳鳴，同頭痛咗幾日添！
意外就發生咗啦！馬後炮都無用，不過都想係到指出樂園嘅問題所在。首先，呢條滑梯有一定危險性，但現場並無工作人員看守。其實其他有同類滑梯嘅水上樂園通常上下都各有一個職員，避免「炒車」出現。其次係工作人員應變不足，係意外之後一段時間先發現。雖然出事之後都有叫我坐低，俾毛巾同水我飲，但有趣的是，我都講咗撞到個頭，佢地竟然教我企係身跳，正番啲水出嚟！當然我亦無見到工作人員有拎急救箱或輪椅等急救用品，我有啲懷疑呢度有無急救員同急救設備。好彩今次唔算太嚴重，過咗幾日就無事。呢個始終係親子樂園，提提各位父母，玩嘅時候要睇實小朋友，萬一出意外，真係自求多福了！哈哈！
白石充氣水上樂園
日期：8-9/7、15-16/7、22-23/7、29-30/7、5-6/8、12-13/8
時段收費：$180（11am-1pm；6:30pm-8:30pm）、$240（1:30pm-3:30pm；4pm-6pm）、$420（連續三節）（BBQ 需額外收費）
地址：馬鞍山白石1950號白石燒烤
預訂電話：27448188
睇更多拍拖好去處！
FB： 依莉詩生活
IG： ErieDiary
網址：ErieDiary.hk
YouTube：Diary Erie
【延伸閱讀】
