天氣開始清涼，係時候出去走走。最近知道有個免費，又有嘢食又有嘢玩嘅遊學團，我 依莉詩 梗係報名參加啦！雖然去嘅地方都唔太特別，不過有「地膽」同導遊講故仔，可以發掘到好多平時唔留意嘅香港傳統文化。
呢個「領展社區遊樂團」由 9月至 11月舉辦 20個主題遊樂團，因為係先導計劃，所以經唔同地方報咗名嘅人都可以免費參加。雖然而家介紹可能有啲遲，不過就算報唔到名，大家都可以跟住嗰 4條路線感受吓商場以外嘅香港啊！而我今次參加嘅就係「遊九龍・嚐港味」。
第一站：黃大仙祠搵月老
以前牛頭角番工，日日搭車都經過黃大仙，但入黃大仙祠就真係第一次！估唔到，唔係年三十晚搶頭炷香，都一樣人山人海。唔入去都唔知，原來呢度唔止拜「有求必應」嘅黃大仙，同時仲崇奉儒、釋、道三教，好似孔子、月老等等都有祠係入面。中國傳統文化嘅包容力真係好強呢！
入得去除咗拜神，都要欣賞吓佢嘅建築佈局，祠內嘅飛鸞台、經堂、玉液池、盂香亭及照壁，各代表金、木、水、火、土五行，顏色配搭同雕刻都好有傳統色彩。無論係唔係遊客都應該去行一轉。
▲ 黃大仙祠嘅左手邊係拜月老嘅地方，大家都可以攞條紅繩去求姻緣啊！
嗇色園黃大仙祠
地址：九龍黃大仙竹園村2號
第二站：學整爆餡小籠包
係黃大仙祠逼完之後，下一站就係去黃大仙中心坐定定食嘢。講真上海廳 1930 其實無乜特別，係上海婆婆旗下嘅一間餐廳，以上海菜嚟講質素都唔錯。而跟呢個團最大好處就無係有師傳教你整小籠包！原來要將滿滿嘅肉包入塊皮係咁難嘅，一個唔小心就爆晒餡！
▲ 可惜行程緊逼，唔夠時間等佢蒸埋就要去下站了。你又估唔估到邊個係我整㗎呢？
▲ 玩完一輪就係食嘅時間，呢碟皮蛋豆腐少少辣，加埋皮蛋同非常滑嘅豆腐，好開胃，但身邊嘅外國團友就食到⋯⋯哈哈
上海廳 1930
地址：黃大仙龍翔道136號黃大仙中心北館地下低層LG05-08號舖
第三站：即食新鮮出爐蛋撻
食飽之後就搭地鐵去樂富，準備行去九龍城。經過樂富市集見到蛋達新鮮出爐，雖然食到好飽，但諗起入面滑嘟嘟嘅蛋，都忍唔住買咗個嚟食。
▲ 你鍾意牛油皮定酥皮多啲呢？我就覺得新鮮出爐就係好食！
蛋撻王
第四站：品嚐正宗功夫茶
食完蛋達梗係要消吓滯，導遊就帶咗我哋去劉裕發茶莊。起初都擔心會唔會焗我哋買茶，好彩無，而且師傳仲好好人，不停沖茶畀我哋試。原來呢間茶館已經第三代，師傳劉原十多年前從父親劉國浩手中繼承茶莊後，引入新穎的經營方式。除咗買茶，亦會開辦茶藝課程教授泡茶品飲技巧。
▲ 沖茶真係好大學問，劉師傅用「韓信點兵」嘅方法，等每杯茶都發揮最佳嘅味道。
▲ 潮汕人嘅劉師傳一邊沖功夫茶一邊話畀大家知茶嘅分類同用品茶基本禮儀。
劉裕發茶莊
地址：九龍樂富廣場第一期2樓2113號
第五站：聽地膽細說昔日九龍寨城
離開樂富行 20分鐘左右，終於嚟到九龍城寨公園，我自從中學考察做 project 之後都會無點認真行過。對於我嚟講，呢度只係一個公園。經過「地膽」70後 Carly 講佢童年對九龍城嘅回憶之後，我終於明白點解，呢個以前「三不管」嘅地方，有咁少外國人鍾意。
▲ 九龍寨城係英屬香港時期一個獨立嘅城邦，亦曾經係世界上人口密度最高的地區之一，不過而家已經變成一個 TVB 古裝劇嘅取景地了。
九龍寨城公園
地址：香港九龍九龍城東正道
第六站：食 100%魚肉彈牙魚蛋
九龍城出名多泰國食店，但老鋪都一樣多，好似呢間德興魚蛋，以前就係九龍城寨開店，搬至獅子石道店都已經二十幾年。九龍城無人唔識，連發哥都係 Fans。而最出名梗係 100% 魚肉做嘅手製魚蛋，老闆平哥一日就要唧過千粒魚蛋，每粒都彈牙鮮味！
▲ 冰冷嘅魚漿 100%全魚肉做，要好用力先打到起膠，仲要一粒粒唧出嚟，可見平哥嘅功力！
德興魚蛋
地址︰九龍城福佬村道76號地下
第七站：嘆香口石磨豆腐花
德興魚蛋對面，就係同樣有舊城風味嘅公和荳品廠。公和荳品廠有兩間分店，分別喺深水埗同九龍城。九龍城店屹立近60年，無論瓷磚定牌匾都未曾改變，保留住一貫舊有風味。不過要食到呢種味道就要襯早！繼上年被投訴，要由瓦碗轉用即棄餐具同立食後，最近鋪位又被大財團發展商收購，恐怕好快就無機會食到了！
▲ 手磨豆腐花細滑且豆香濃郁，同平時食入口即溶嘅豆腐花有唔同嘅口感。
公和荳品廠
地址：九龍城福佬村道67號
更多一日遊路線！
長洲 1.5 日單車美食懶人包！食盡 7大小食 ＋ 張保仔洞探險
【延伸閱讀】
