鴨脷洲漁村風情半日遊！食盡老香港情懷 – 船河、大排檔、糕點小食

身為一個鍾意捐窿捐罅、土生土長嘅香港人，香港大部份地方都差唔多去齊，但就係未去過鴨脷洲！既然南港島線通咗車，今次我依莉詩就跟大仁生活一家嚟個鴨脷洲半日遊，睇吓有咩特色美食啦！

鴨脷洲充滿漁村風情

鴨脷洲係香港島西南面，香港仔同埋香港仔海峽附近嘅一個島。因為形似鴨脷，所以叫鴨脷洲。明朝就有唔少漁民聚居，加上最初利東邨起嚟係為咗安置因香港仔避風塘大火而無家可歸嘅漁民，所以鴨脷洲舊區一帶依然保留好多水上人嘅歷史痕跡。由街渡到洪聖古廟，仲有即煮海鮮嘅大排檔，種種都充滿漁村風情。雖然喺全世界人口第二密嘅島，但今次去到又唔算太迫太多人，而且麻雀雖小，五臟俱全，好值得假日去行吓！

第一站 – 搭舢舨欣賞港灣景色

除咗可以搭新開嘅南港島線利東站，其實都有巴士、專線小巴同街渡到鴨脷洲，交通都好方便㗎！而今次我哋就選擇由香港仔珍寶碼頭出發，搭街渡去鴨脷洲，體驗一吓漁村風情！喺細細嘅紅黃綠 3色嘅碼頭登上傳統舢舨，大約 3分鐘就到。船程雖然短，但海風吹埋嚟都約舒服㗎！

▲ 雖然坪洲、南丫島等離島都有街渡搭，但喺傳統舢舨搭得耐有時都約驚，而今次船程約 3分鐘，我就覺得啱啱好！成人每位$2.2，小童每位$1.2，仲可用八達通或現金付款𠻹！

第二站 – 試食香港僅存的艇仔粉

坐完傳統舢舨，一於試吓水上人獨有嘅艇仔粉！因為牌照關係，艇仔粉愈嚟愈少，而流記香港仔艇仔粉就係香港僅存嘅其中一間艇仔粉，多數喺香港仔沿海旁及香港仔漁市場一帶出沒。以前想食只可以靠運氣，好彩而家科技發達咗，可以用電話 Call 定流叔，問清楚位置同營業時間，唔使白去一場！

▲ 雜錦艇仔粉 $30

艇仔粉用梭羅魚同大地魚做湯底，味道鮮甜，再加上燒鴨、魚蛋、叉燒、牛腩, 豬肚, 豬頸肉等等，好似一碗極豐富嘅車仔麵。

流記香港仔艇仔粉
電話:9140 2628 （不會使用whatsapp)
出沒位置: 香港仔沿海旁及香港仔漁市場一帶
(不固定，建議食粉前打電話確認流叔出沒位置）
時間: 早上10:00 – 下午16:00

第三站 – 參觀百年歷史的洪聖古廟

食完艇仔粉到海濱散散步。呢度唔單止有漁業展覽廊，有大大小小嘅塑像，仲有展館介紹香港漁民嘅生活習俗，更有一座逾二百年歷史、已列入法定古跡嘅洪聖古廟，可以進一步了解鴨脷洲百年漁村嘅面貌。

▲ 漁業展覽廊有大大小小嘅塑像同展品重現昔日香港漁民嘅生活。

第四站 – 一嚐平民大排檔風味

之後就到鴨脷洲市政大樓嘅二樓熟食中心，由粥粉麵飯到海鮮大餐都可以搵到，唔少熟客都會喺街市買好海鮮，再搵相熟嘅店家烹煮加工。不過好似我哋呢啲即興幫襯嘅都唔使失望，好似陳新記嘅小食就一樣令我哋食得津津有味！

▲ 雖然食唔到招牌老闆九棍魚皮，不過陳新記嘅炸三寶，即係魚皮、魚片頭同雲吞一樣咁吸引！

▲ 炸魚皮新鮮即炸又香口又脆，炸魚片頭更加彈牙有魚味，而我最欣賞就係炸雲吞，入面有蝦有肉，好足料呢！

▲ 另一樣招牌菜就係一口西多，厚切西多一啖一件，滿滿嘅煉奶同花生醬，未食都流口水！

陳新記
電話: 25551862
地址: 鴨脷洲鴨利洲大街鴨利洲市政大廈1樓
時間: 星期一至日 (07:00 – 17:00)

第五站 – 到風之搭公園小休

又食完一餐，喺時候休息吓。沿鴨脷洲海濱長廊行到風之搭公園，廣場同巨型帆船形燈塔設計都以漁村文化做主題，好有特色。當中顯示燈依靠太陽能發電板發電，會隨風速改變顏色，有趣又環保。

▲ 食飽最好睡一睡，有人就瞓到死死吓，又人就掛住玩 Pokemon Go！

第六站 – 搶食街坊最愛傳統糕點

叉足電又繼續食過！基本上鴨利洲最旺就係一條鴨利洲大街，沿路都有唔少食店，但偏偏有一間長期排長龍。呢間地膽推介嘅小店售賣本地傳統糕點，西米糕、馬蹄糕、香蕉糕、大菜糕、砵仔糕、桂花糕，種類好多，充滿童年嘅味道！

▲ 大菜糕、西米糍、砵仔糕、桂花糕 $6/件

桂花糕做得好晶瑩剔透，淡黃色夾雜桂花同杞子，好靚好吸睛，而大菜糕好滑好爽口，非常清新。

友和士多
地址: 鴨脷洲鴨脷洲大街110號前舖
時間: 9am-7pm

第七站 – 歎即叫即拉豬潤腸

行咗幾步，阿仁畀啲即叫即拉嘅豬潤腸吸引住，於是我哋今日嘅第n餐。無錯！今日嘅半日遊行程就係食食食食同食！金龍茶餐廳裝修唔算特別，都係普通家庭式茶餐廳嘅氣氛，不過畀起市區嘅店，就多咗一份久遺了嘅人情味！喺我哋討論食豬潤腸定齋腸嘅時候，伙記竟然會搭訕傾埋一份，真係好搞笑。或者，有時我哋就喺衝忙中，忘記咗呢份人與人之間嘅交流。