好耐無寫過 Gadget 產品，最近我 依莉詩 收到件新玩具，一個鬧鐘有齊藍牙喇叭、FM 收音機、鬧鐘、USB 充電、床頭燈、氣氛燈等等功能，仲勁過「攞你命 3000」！呢個 WITTI Beddi Glow 智能鬧鐘之前喺 Kickstarter 集資成功。雖然係由本地公司設計，但功能好外國化，除咗可以用藍牙接駁《Beddi》手機App，仲可以整合《Spotify》、Apple Music，甚至 Call 《Uber》添！
LED 隨音樂變色轉光暗，床頭燈助入睡
智能鬧鐘我之前都有一個，不過功能無呢個咁多，只係可以播歌同控制 LED 燈砌圖案。而呢個就勁好多，唔單止可以按照喜好調校 1,600萬種色，LED 燈仲會喺接駁 《Spotify》 或 Apple Music 播歌時，會隨音樂節拍而變色同跳動，改變房間嘅氣氛。
對於經常失眠嘅我嚟講，有時太靜或者太黑反而瞓唔到。既然放得喺瞓房，Beddi Glow 仲有兩個功能幫助你瞓得更好，就好似播放白噪音功能，係入睡前播放風聲、雨聲、海浪聲及叢林聲等，令身心放鬆，慢慢入睡。另一個功能就係模擬日光柔和的光線，令自己慢慢瞓醒。好啱我呢啲房間無窗，生理時鐘打亂晒嘅人，慢慢調番好作息時間。
▲ Beddi Glow 比起之前幾代都大舊，正面以幾何圖形分開 3個部分，用作不同功能，左邊顯示時間等資訊，右邊係喇叭，而下面就係因 LED 燈。頂部係多個按掣用作快捷鍵開始功能，而後方就有兩個 USB充電插口。感覺就好似將唔同嘅部份黏埋一齊呢！
▲ Beddi Glow 功能多多，所以都比較耗電，要長期插濕電，唔似普通鬧鐘入兩粒電就可以用大半年。
機頂按鈕隨時改，一按即 call Uber 都得
呢個智能鬧鐘最正係可以自己設定頂部 light 同 smart 鍵嘅功能，仲分咗單按、雙按和長按三種，換然之有 6個快捷功能可以設定。只要預先係手機 App 設定好，以後㩒個掣就可以播歌、call 車、報天氣同交通情況、控制燈光等等功能，唔使下下開 App 非常方便。
▲ 只要係 App 設定 GPS ，會朝起身就會透過鬧鐘語音提示報天氣同交通情況，趕時間仲可以立即 call 埋 Uber 番工添！
▲ 係 App 內可以設定 light 同 smart 鍵嘅功能，簡單易用，隨時轉都無問題。
依莉詩：「功能方便！㩒個掣小睡 10分鐘」
雖然係一個「智能鬧鐘」，但 Beddi Glow 做到嘅已經遠遠超過一個鬧鐘嘅功能，相比起之前買嘅 AURABOX 智能鬧鐘，我覺得呢個更實用，用藍芽連接起上嚟亦更方便。對於間房唔係大嘅家庭，放一舊係床頭就有晒，燈、喇叭同鐘嘅功能既實用又慳位。雖然連接 Uber 嘅功能對細小嘅香港無乜用，播歌亦唔算特別靚聲，不過我幾鍾意白噪音同小睡模式，㩒個掣，就會自己倒數 10分鐘叫醒你，唔使慢慢校鬧鐘，可以爭取多十幾秒瞓晏覺嘛！
WITTI Beddi Glow
售價：HK$699
查詢：永利達國際（2407 1118）
缺少呢 3點，尿袋幾大都無用！依莉詩教你揀流動充電器
直播再不是照妖鏡！素顏拍片都不怕！自拍神器 美圖T8 上手玩
睇更多拍拖好去處！
FB： 依莉“詩”生活
IG： ErieDiary
網址：ErieDiary.hk
YouTube：Diary Erie
【延伸閱讀】
