Day 1 同 Day 2 感受完醉人嘅澳門夜景同紙醉金迷嘅氹仔賭城區之後，第三日決定放下重重嘅相機同腳架，走入與世無爭嘅小漁村－路環。亦因如此，呢篇嘅放閃相大減，行程亦非常非常 hea。
雙人單車 hea 遊路環
雖然氹仔同路環因為不斷填海，早已經連埋咗，不過就呈現與澳門半島或者氹仔截然不同風情，到達後好容易就令人放鬆，停下腳步好好休息。路環其實唔係好大，基本上徒步已經可以行晒，不過今次選擇咗踏單車 (本來諗住去黑沙滑草，但 Raymond 係咁話要踏單車)。
搵咗好耐，我哋終於搵到間單車鋪，仲租咗架雙人單車。呢度嘅人真係非常純樸，完全唔使押金或者身份證，連電話都係留香港電話嘅情況下，話租就租得走架單車。如果係香港根本不可能吧！不過咁講，如果唔去埋黑沙，踩單車十幾分鐘已經可以遊完一圈，比長洲還細呢！
▲ 最特別的是，呢度竟然可以玩擦地砲，$4 就有一包，好多小朋友都會係聖方濟各教堂前面空地玩呢！
▲ 大三巴旁邊有「戀愛巷」，而路環就有一條「情人街」，不過呢條「街」只有 4步路咁長，貼路牌嘅牆後竟然係公廁，哈哈！
▲ 去到路環碼頭，其實一艘船都見唔到，見到幾間店係度曬鹹魚。
▲ 舊碼頭仍然保留係度，係面影相好文青呢！不過就要注意安全，因為潮脹會浸晒成個碼頭呢！
▲ 踩咗兩個鐘單車 (唔知兜咗幾多個圈)，之後去咗安德魯餅店買葡撻，新鮮出爐，外面脆卜卜，入面又香又滑，無論食幾多次都會再食。
▲ 買完葡撻就坐係「十月初五馬路」邊食邊落日落，呢種恬靜休閒，可以好好咁清理心中嘅不快與不安。
佛笑樓食乳鴿葡國菜
日落過後，就搭巴士返去福隆新街食呢個旅程最貴嘅一餐－佛笑樓。呢間餐廳係澳門有近百年歷史。就算成日經過，不過細個偶然先食得一次，有次姨媽請我食巨型梳乎厘，到依家都仲好記得當時嘅興奮呢！亦因為咁，所以今次想帶 Raymond 試下，不過得兩個人，叫唔到梳乎厘，所以就叫咗出名嘅石岐燒乳鴿、炸馬介休球同佛笑樓焗飯。燒乳鴿加上瑞士汁相當入味，而且皮脆肉滑，非常滋味，難怪咁多年屹立不倒。
▲ 炸馬介休球入面嘅魚肉纖維一絲絲咁，證明有非常多魚肉呢！比起第二度混合大量薯仔就係水準高好多。
▲ 佛笑樓焗飯其實係海鮮飯食落都幾多材料，有快就好飽了。
議事庭前地睇聖誕燈飾
雖然今年光影節唔包括議事庭前地，不過旅客區又點會無聖誕裝飾。大致其實同上年差唔多，都係大大棵聖誕樹係中間，旁邊圍住聖誕老人同鹿，而入啲就係一片燈海，睇落都幾靚架！
▲ 實在太太太多人，散咗陣步就番去瞓了！
快啲 click 入去睇埋晒 Day 1-4 嘅分享吧！
- 【澳門】拍住拖遊澳門半島！下環街市隱世小食 X 夜遊光影節
- 【澳門】探索氹仔新與舊！官也街中伏店 x 免費搭永利纜車 x 夜遊巴黎人
- 【澳門】單車路環半日遊！食住葡撻睇日落 x 豪食乳鴿葡國菜
- 【澳門】居高臨下飽覽澳門城區！參觀可能係全世界最細嘅動物園同最短嘅纜車
【延伸閱讀】
