觀塘美食 $300 兩個人食到飽！脆卜卜香蕉煎餅 + 石磨皺皮腸粉

屋邨食嘢最緊要平靚正，一落街有好嘢食就 perfect！最近觀塘秀茂坪多咗條新食街，有 10幾間小食店，價格都幾親民，而且營業到凌晨12點，可以話係街坊嘅好消息！而我依莉詩同餵蚊就去咗呢條食街所在地 – 寶達商場，食到飽飽！

1) 泰式香蕉煎餅

食街的小食唔算太有特色，不過就夠晒平民。餃子、車仔麵、腸粉都係宵夜經常食嘅美食。而當中我最鍾意就係「撈得店」嘅泰國香蕉煎餅。煎餅以春卷皮代替傳統泰式手搓薄餅，輕脆外皮加上蛋同香蕉片，外脆內軟。最重要係即叫即造，熱辣辣淋上煉奶，甜度剛好。不過就要等成半個鐘先有得食，要耐心等待。

▲ 香蕉煎餅 $20

▲ 入面嘅香蕉片超多，外脆內軟，好香蕉味。

▲ 呢檔超受歡迎，因為係即叫即整，要等成半個鐘先有得食呢！

▲ 撈得店

2) 石磨皺皮腸粉

平時啲腸粉都係滑嘟嘟，但來自九龍灣街市嘅「食好啲」櫃桶腸粉就皺晒皮。用自家製嘅石磨米漿，放入櫃桶蒸，腸粉帶點煙韌，加上肉碎、蔥同雞蛋，口感非常特別。

▲ 石磨瘦肉腸粉 $26

▲ 食好啲

3) 即包即煎餃子

另一檔推介係即叫即整嘅「皇后餃子」，全新都係即場包，可以揀放湯或煎餃。而且有多種口味，有韭菜、芝士栗米、泡菜，仲有最近熱爆嘅芫茜！可惜包餃子需時，又多人買，所以我排到去得返韭菜味咋！煎餃先蒸後煎，不算太脆，反而湯餃肉汁較多，更加好食。

▲ 湯餃 $28/10隻

▲ 煎餃 $10/3隻

▲ 餃子皮薄多肉，湯餃亦好多肉汁呢！

▲ 皇后餃子

4) 大大隻豉油雞髀

「新興車仔麵」應該主打車仔麵，不過豉油雞髀就更吸引，大大隻都係 $16，多肉又入味。至於，車仔麵兩餸 $25，得一塊漢堡扒同兩粒魚皮餃，抵唔抵就見人見智，不過佢除咗腩汁同咖喱汁外，仲有秘醬可以加，絕對係成碗車仔麵嘅精粹。

▲ 豉油雞髀 $16

▲ 新興車仔麵

5) 鹽焗手撕雞

食手撕雞都係貪佢啖啖肉。「琪味手撕雞」肯定無呃秤，連骨帶肉上，清楚有齊雞腳同雞翼尖。不過，$55 半隻雞有啲貴，而且食落就有啲鹹同食完有啲口乾𠻹！

▲ 琪味手撕雞

6) 解甜豬潤湯底海鮮鍋

掃小食食唔飽，可以去「正一麵」打一人邊爐。套餐可以揀有蝦、蟹或者沙巴就主食，配埋肥牛同菜都唔使$100，同係快餐店打邊爐差唔多價，但就新鮮好多。最特別用豬潤做湯底，配海鮮，非常鮮甜。如果唔夠喉，仲可以加 $30 要一份街市即撈海鮮，一份有齊蝦、鮑魚、扇貝，相當抵食！仲係唔夠，仲可以自己去街市買海鮮，畀 $30/斤加工費，餐廳會幫你洗埋即時食𠻹！