葵芳美食節又嚟啦！今年多咗東南亞美食區，泰式船粉、韓式魚糕串、仲有台灣腸⋯⋯好多嘢食！等我 依莉詩 同 大仁一家帶你去感受吓熱鬧氣氛啦！開到 11月4號 咋！要去就快啦！
新增東南亞小食區
由10月27日至11月4日，一連九日葵廣隔離運動場搞咗個香港葵涌運動場。今年設有有5大主題展區，約290個戶外攤位，買嘅嘢同工展會差唔多。而熟食除咗往年多款大受歡迎熟食，今年新增東南亞特色主題區，而入場費只是$5，約定朋友們去掃街啦！
1) 泰式船粉
小食區最受歡迎就係呢檔泰式船粉，入面有脆卜卜嘅豬油渣、豬潤同豬肉丸，河粉索晒啲汁，入味之餘，酸酸辣辣好過癮。豬潤薄薄哋，幾爽口，豬肉丸彈牙入味。
▲ 泰式撈船粉 $35
3)芒果糯米飯配雪糕
今次有幾間都賣芒果糯米飯，各有賣點，即開即切嘅就$40，有間一早即起嘅就$20，而我推介呢間芒果雪糕糯米飯 $30，估計大約有半芒果份量，特別在有一球雪糕，仲有啲好似椰果嘅透明粒粒，好開胃。
4) 椰青自己揀自己開
東南亞飲品一定唔少得椰青，呢檔個店主好醒目，要人自己揀自己開，力都唔使出就坐定定收錢，哈哈…不過都係賣點嚟嘅！我不停鑽，結果用咗成分鐘先成功開到個椰青。不過餵蚊竟然唔欣賞個椰青，話酸酸地，有D怪味。睇嚟我揀咗個籮底椰青，可能等返貨之後，叫店員教我哋揀會安全啲。
▲ 出盡九牛二虎之力先開到個椰青青青，但竟然唔好飲！
5)素食紫豆卷
今次見好多小食店都貼咗支持自攜餐具，不過會場唔畀洗嘢，確實有啲麻煩。而呢檔素食就值得一讚！紫豆卷 $7/串，$12/2串 好食之外，自備餐具仲送幾件齋𠻹！
▲ 煎素餃子 $20/5隻 入面有椰菜同腐皮，唔講都唔知係素。
5）安格斯漢堡扒配黑松露芝士汁
呢塊安格斯漢堡扒好厚好吸引，配黑松露芝士汁、流沙蛋黃汁或者蜜糖芥末汁其中一款。我哋揀咗黑松露芝士汁，個汁好濃，不過因為我哋要求佢剪開兩份，所以個心唔係好熟，但外面又好「鞋」，所以下次都係唔好貪影相靚，切返4份好啲！
▲ 安格斯漢堡扒 $50 ，煎香咗好香好吸引。
6) 台灣腸老是常
有親小食檔「黑橋牌」台灣腸就一定會出現，一碌碌又肥又粗，就係見親都心思思想食！
▲ 黑橋牌腸 $12、花枝丸 $12
7) 菠蘿仔免費派
大會喺會場中間每日免費派70個菠蘿仔。本來截咗龍，估唔到仲有最尾6個，畀我哋啱啱好拎到！咁熱食呢啲清涼嘅生果，真係特別清甜。
▲ 仲有好多特式小食㗎！
▲ 白雲鳳爪都有。
▲ 韓式魚糕串 $15/串, $30/串 
▲ 仲有工展會次次都見到嘅小籠包𠻹！
第7屆香港美食嘉年華
地點：新界葵芳興芳路223號葵涌運動場（港鐵葵芳站C或D出口）
日期：10月27日至11月4日
開放時間：11:30-21:00（嘉年華於每天結束前30分鐘及最後一天結束前1小時停止售票及入場）
入場費用：$5 （身高1米或以下小童、65歲或以上長者及殘疾人士免費）
各區美食精選！
旺角慢煮快食新體驗！6間中日泰美食登陸彌敦道 700號｜北海道拉麵X清邁咖喱麵
地膽帶路！土瓜灣街頭小食 – 足料花膠魚肚粥 + 濃香米香腸粉
地膽推介！$150 掃盡 5大紅磡街頭小食 – 混醬班戟麵條 + 超大粒手製芋圓
死場不再！10間平民食肆進駐荃灣新 Food Court – 嫩滑手撕雞腸粉 x 醒胃麻辣串
粉色系呃 like 甜品團！食盡荃灣 3大潮食店 – 玫瑰士多啤梨窩夫 X 山形縣白桃厚班戟
大坑 2大呃 Like 甜品！ 粉色棉花糖燒 x 彩虹沖繩鹽刨冰
5萬呎水產市場登陸黃埔！九號水產 4大食店率先睇 – 蟹痴必掃北海道皇帝蟹
旺角 1日 4餐，由朝食到晚！青檸烏冬係劣食？韓系日式吉列牛一定正？
銅鑼灣 SOGO 地庫重開！5大人氣日本過江龍進駐 必食香脆海鮮煎餅 + 鹿兒島彈牙魚餅
元朗 4大人氣食店！必食北海道布丁燒 X 啖啖肉無骨雞翼包
屯門潮食集中地！紅橋 4大不得不吃的小食+主菜+甜品
睇更多拍拖好去處！
FB： 依莉“詩”生活
IG： ErieDiary
網址：ErieDiary.hk
YouTube：Diary Erie
【延伸閱讀】
