深水埗抵食新派飯堂!$88 原條鰻魚蛋包飯+原條燒魷魚芝士濃湯鍋

深水埗平民食肆多,維記、劉森記、十八座狗仔粉間間都又平又抵食!我 依莉詩 最近去咗間新派餐廳,同樣平民,一個早排好 hit 嘅「邪惡芝士拉絲」鐵板都唔洗$50,一個原條鰻魚蛋包飯都只係 $88,足料又大份,難怪開咗 3年都仲咁多人去食!

平民新派飯堂

好多時新派餐廳啲人都只係慕名而來,甚至大家都覺得「邪惡芝士拉絲」鐵板都已經 Out咗,但呢間飯意係深水埗一條比較少人嘅街,開咗 3年,我星期六下午去食都仲有咁多人,而且眼見食客都係男士居多,證明唔只係 gimmick,份量仲好夠先會有回頭客!以深水埗食店嚟講,環境方面都算企理,似一間少少嘅茶餐廳,牆上掛滿食物相片,簡簡單單。MENU方面都有好多選擇,除咗鐵板,仲有蛋包飯、芝士鍋,都幾吸引。最近餐廳搞緊個 3週年優惠平日$2隻雞翼,幾抵食!

▲ 蒲燒珍寶鰻魚蛋包飯 $88

平時一個鰻魚飯閒閒哋都過百,但呢度 $88 就食到 20cm 咁長,又厚又肥美嘅蒲燒鰻魚,汁甜無骨,配上煮到半熟嘅蛋包飯,無論打卡定美道一樣吸引。

▲ 鰻魚厚肉,無骨,可以放心大大啖咬!醬汁加上芝麻,燒得香口又唔乾。▲ 蛋包飯由嫩蛋覆蓋,煎得啱啱好,唯一美中不足就係飯同鰻魚分開上,令貌相扣咗少少分,少咗種澎湃嘅感覺。同埋飯比較乾,要自行淋鰻魚到飯入面一齊食先有鰻魚飯嘅味道。

 

▲ 原條燒魷魚芝士濃湯鍋 $88

呢個鍋由鐵網分格上下兩層,上面鋪有薯格同原條燒魷魚,下層用石鍋裝住濃湯芝士鍋、手作麵同餃子,雖然個鐵網只係裝飾,但貌相就滿分!魷魚燒到香噴噴,依然彈牙,有肉哋,塗滿惹味醬汁,有少少辣,配芝士鍋就唔怕膩!炸餃子、年糕同意粉沾滿啖啖香濃芝士汁,creamy細滑!

▲ 芝士濃湯鍋 唔係拉絲嗰種,但又濃又滑嘅芝士濃湯,比拉絲芝士更惹味,芝士迷一定會鍾意!而手作意粉質感似烏東煙煙韌韌,沾上芝士濃湯好似食緊芝士鍋,唔會太膩但好滿足!

▲ 入面仲有韓式年糕同餃子,非常足料!

飯意主題餐應

地址: 深水埗元州街146號華興大樓地舖

營業時間:星期一至日 (11:00-23:00 )

 

各區美食精選!

地膽帶路!土瓜灣街頭小食 – 足料花膠魚肚粥 + 濃香米香腸粉

地膽推介!$150 掃盡 5大紅磡街頭小食 – 混醬班戟麵條 + 超大粒手製芋圓

死場不再!10間平民食肆進駐荃灣新 Food Court – 嫩滑手撕雞腸粉 x 醒胃麻辣串

粉色系呃 like 甜品團!食盡荃灣 3大潮食店 – 玫瑰士多啤梨窩夫 X 山形縣白桃厚班戟

大坑 2大呃 Like 甜品! 粉色棉花糖燒 x 彩虹沖繩鹽刨冰

5萬呎水產市場登陸黃埔!九號水產 4大食店率先睇 – 蟹痴必掃北海道皇帝蟹

旺角 1日 4餐,由朝食到晚!青檸烏冬係劣食?韓系日式吉列牛一定正?

銅鑼灣 SOGO 地庫重開!5大人氣日本過江龍進駐 必食香脆海鮮煎餅 + 鹿兒島彈牙魚餅

元朗 4大人氣食店!必食北海道布丁燒 X 啖啖肉無骨雞翼包

屯門潮食集中地!紅橋 4大不得不吃的小食+主菜+甜品

 

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie



About 依莉詩

網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。