$10一圈朱古力醬？尖沙咀新開大阪梳乎班戟伏味濃！

最近梳乎班戟店愈開愈多，無講係 am.pm. 、 I love you Dessert BAR 呢類街頭小店，或者發記、Ocio 等港式甜品鋪都紛紛加入戰團。不過當中最有名氣一定係一班日本過江龍啦！先有 K11 幾乎日日排長龍嘅 PAN de PAIN，再有希慎嘅 Flipper 奇蹟之班戟，當中有好食嘅，亦有更好食嘅！我依莉詩呢個梳乎班戟迷，一知道大阪人氣班戟店 – gram cafe & pancakes 登陸尖沙咀 The One，梗係嗱嗱聲去排隊啦！可以今次食到嘅，並唔係滿滿幸福同空氣感嘅 Pancake，反而食到一肚氣！！！！

限量供應排3個鐘隊無得食！

一如所料，gram cafe & pancakes 嘅「特製Premium Pancake」會好似大阪心齋橋店咁，每日只有 3個時段，每時段各限定20份，所以需要早一個小時前去排隊。咁因為係開業頭幾日去，我哋一行 5人都有心理準備會好混亂，所以 12點就去到排 3點場。

果然 12點就開始Mark名，每組人都按指示派代表排隊，餵蚊排第二個，本來問題不大的。就要因為我去了洗手間，餵蚊報了2位，我番到隊就立即同店員講我哋係 5位，佢亦表示無問題，仲幫我哋改番 5位。因為要等 3小時，我哋就選擇輪流一換一排隊，但不知道為何，到入場時，店員話只能提供兩個位畀我哋！！！！如果一早話Mark完名唔得加得人嘅，咁我哋就唔洗白白排 3粒鐘喇！

結果，阿仁一家白白幫我哋排咗 3個鐘隊，但就無得食，而且店員仲要一啲唔好意思都冇！明明睇到張紙都Mark咗 5位！我同餵蚊食完之後就嘗試幫阿仁一家再排 6點場，點知就更更更混亂！！！！店員表示商場唔畀排隊，所以唔可以排，變相大家到圍住門口分了4、5條隊排。結果一開始宣報Mark名，大家就衝晒去商場玻璃度！真係項級危險！！！估唔到食件 pancake 係要搵命駁的～

$10一圈朱古力醬當裝飾？

好啦～新店開業都預咗混亂，如果食到好食嘅嘢都無所謂，可惜係我太天真了！！！以為過江龍就有番日本店應有嘅水準，今次真係令我太太太失望！「特製Premium Pancake」未到，我就先點咗個「法式多士」，咁我見得忌廉咁 Dry ，所以就加 $12 要香蕉同加 $10 要朱古力醬。點知呢個就真係超級大伏！！！

加$10 先有嘅朱古力醬，原來得一個圈！！！連裝飾都嫌少啦！乜而家啲朱古力醬咁貴㗎咩？沒有更衰，只有更衰！我好聲好氣問店員點解得咁少朱古力醬，佢竟然黑我面，仲好唔願意咁拎番入廚房加料～唉～加完出嚟，廚師根本就亂咁唧一堆嘢！唉～圖文不符我理解，原味$78價錢都接受到，但佢咁明玩嘢法，有回頭客先奇！

▲ 餐牌寫住法式多士$78 ，朱古力醬加$10，香蕉加$12，雪糕加$20，咁正常人都唔會諗到另加嘅朱古力醬係呢個份量囉！

▲ 少得可憐嘅朱古力醬！你發現到嗎？

▲ 反映完，再被店員黑面後，變成了一件「藝術品」。

▲ 再嚟個 Top Shoot 畀大家好好欣賞！

$138 限量招牌班戟

等咗十幾分鐘，重頭戲「特製Premium Pancake」終於有得食啦！3層 Pancake 每層都有 4cm 厚，賣相都算睇得，都有蛋香，但唔係好有空氣感，亦唔係蛋糕質感，反而似日本麵粉整出嚟嘅卷蛋咁，綿密有彈性，口感比較實在，質感鬆軟程度都唔及旺角兩大街頭小店。如果以 $138 呢個價錢食原味 Pancake，性價比極低！寧願行多兩步去 K11 好過！