屋邨冬菇亭食新鮮刺身！大圍日本料理

最近好忙好少出去食好嘢，今次由教父帶我依莉詩去大圍冬菇亭食日本料理！你無聽錯，冬菇亭唔止大排檔，原來仲有日本嘢食，而且刺身同串燒水準都幾高，坐得又舒服，完全打破我對冬菇亭嘅印象！

打破冬菇亭舊印象！環境光猛有冷氣

細個去冬菇亭都覺得好污髒，又熱又焗，個個係度食煙飲酒，估唔到而家嘅冬菇亭已經唔同晒！呢間「壹級日本料理」喺大圍美林邨冬菇亭，外觀保留冬菇亭原有設計，所以樓底極高，裝修過後，內部亦變得光猛有冷氣，坐得都幾舒服。店內唔單止有卡位，仲有bar 枱同大圓枱，無論一個人、情侶定成班人都照顧到。

▲ 冬菇亭嘅樓底比較高，環境好開揚。我哋放工去食，食客唔多，可以靜靜哋傾計。

款式多食物水準高

講到食物款式，壹級日本料理都幾多元化，由一般日本餐廳有啲壽司刺身、串燒炸物、拉麵魚生飯，到近期大熱嘅浜燒海鮮都有，最特別連鐵板餐都有，真係近合街坊需要，一家大細都有啱食嘅嘢。今次呢餐連加一食咗$1,258，以屋邨餐廳未算特別平，但就算與一般日本餐廳比較，呢個價錢食到呢個水準嘅刺身同串燒，其實都算抵！始終今次揀嘅刺身都係比較貴嘅部位，亦都有返咁上下新鮮。

▲ 刺身併盤

呢盤刺身併盤都幾誇張，有帶子(4片) 、赤身(4片) 、珍寶赤蝦(2隻) 、劍魚腩(4片) 、薄切八爪魚(6片) 、極上三文魚腩(6片) 、油甘魚腩(4片) 、海膽(半板) ，都係比較頂級嘅部位，估唔到屋邨餐廳都可以食到。刺身大部份都係厚切，而且都新鮮爽甜，所以就算價格睇落唔平，但性價比都算高，出面好難用呢個價，食到呢個級數嘅刺身。

▲ 極上三文魚腩(6片) $98

極上三文魚腩厚切肥美，質感爽口彈牙，而劍魚腩同油甘魚腩放入口充滿油香，厚切令入口半溶，而有口感，平衡到當中嘅優點。

▲ 珍寶赤蝦(2隻) $68

赤蝦好大隻，啖啖肉，而且新鮮爽甜。

▲ 海膽(半板) $144

海膽結終係我摯愛，呢半板加拿大海膽厚肉肥美，一塊就有我兩隻手指大小，非常飽滿，食落好有海水味，仲好 Creamy，入口即溶嘅感覺，真係好幸福。加埋紫菜一齊食又有另一番口感。

▲ 串燒併盤

除了刺身，呢度嘅串燒都係唔錯嘅選擇。$12-40就有一串，今次就試咗雞軟骨串、牛脷串、霜降和牛粒串、黑豚腩串、蘋果豚肉串、迷你甜薯同燒菠蘿。每串都充滿炭燒香氣，調味當中唔會過鹹。尤其霜降和牛粒串，肉質鮮嫩，厚切都唔怕太老。而最有驚喜就係蘋果豚肉串，豬肉捲住蘋果，食落爽口清新，可以減低食燒物嘅油膩感。