粉嶺隱世慢活餐廳！高質日式鰻魚蛋包飯 + 免費送清蛋糕等你親自DIY

粉嶺唔少人都覺得係美食沙漠，除咗火車站同華明商場嘅連鎖食肆，最近都要到上水先叫有啖好食！但原來距離粉嶺火車站差唔多 10分鐘步行距離嘅工業大廈內仲有一間滄海遺珠！今次我依莉詩就去咗呢間慢活cafe，hea足成個下晝喇！

和風 Fusion 菜CP值高

「What The Food」呢個餐廳名已經夠搞鬼，連 Menu 都加咗唔少急口令同港產片金句，睇完會令人會心微笑。而菜式就主打 Fusion菜，當中嘅花生醬煙肉芝芝牛肉漢堡就鹹中帶甜，好衝激味蕾！另外仲有麻辣食雞有雞味燉飯、泰國風味冬蔭公意粉同蒜香辣肉腸沙茶風味比薩都非常特別。而飲品方式唔單止有越南滴滴咖啡，仲有補脾養血紅棗桂圓茶等多款養生茶。如果唔飲咖啡，都有一系列「無啡」Latte 可以揀，都幾多元化。

▲ 日式鰻魚蛋包飯 $116

蒲燒蛋包飯係呢度嘅招牌菜。原條肥美嘅蒲燒鰻魚，甜度適中唔膩，日本蛋蛋香十足，煎得啱啱好，又厚又滑，再配埋珍珠米炒飯同木魚花紫菜，好有日式風味！

▲ 花生醬煙肉芝芝牛肉漢堡 $88

花生醬煙肉芝芝牛肉漢堡亦都份量十足，一啖咬落去花生醬同肉汁勁澎湃，加埋煙肉增加鹹度，鹹中帶甜，好衝激味蕾！花生醬嘅粒粒同煙肉嘅脆亦增加唔少口感，食半個都己經好飽！

▲ 套餐包嘅羅宋湯同新鮮麥包都好足料，羅宋湯嘅蔬菜同牛肉都好多，又香又濃，酸酸辣辣夠開胃。

▲ 海鹽脆脆鮮奶 (左) $34、海鹽焦糖脆脆泡沫咖啡(右) $40

海鹽脆脆系列唔止影相靚，脆脆仲好脆口，融入飲品中可以自行調校甜度。如果唔飲咖啡，可以揀鮮奶，兩樣都幾好飲！

歡迎開生日party 慢活唔使「趕埋單」

What The Food Cafe 鼓勵慢活，所以食飽都唔使急住走，一班人可以喺度傾吓計，玩吓卡 game。另外仲有夾糖同 Bake Your Own Corner ，大家可以自助裝飾蛋糕。以我所見，裝飾蛋糕嘅工具都幾齊，由蛋糕刀到蛋糕轉盆都有，加上唔同大細形狀嘅朱古力碎、生日牌等，可以輕易設計一個靚靚生日蛋糕。